之前的章節講述我如何進入地產行業，由開舖做老闆、重回地產行業打工，再輾轉由住宅進化為舖位經紀的情況 (之後有機會再講解為何會轉做舖位經紀，過程十分曲折)。老編想我講多啲關於舖位理論、行業知識和「扯單」嘅事，所以今期會同大家分享一宗充滿火花嘅買賣個案。
故事要回到2015年，有一次我和客人在土瓜灣睇舖，職業病關係，每到一個地區工作，指定動作必定係周圍望下區內有冇行業變化或者吉舖出現。見到有個舖位剛剛「拉閘」不再營業，我即時打電話，叫同事Amy聯絡業主會否放租或放賣。Amy直到晚上才搵到業主余生，余生表示只係想放賣，目標價2,000萬元交吉售。Amy徵得余生同意，第二晚就掛咗塊大型（4×6呎）嘅業主放售木板喺舖面（掛板公司通常在深夜才行動，因為方便泊車），不消半日，Amy就收到個電話，以為有生意上門，點知電話中的女士只是焦急地不停重複「我要買咗間舖，我要買咗間舖……」
Amy心諗：「唔通有人玩嘢？」，但仍禮貌地請呢位女士先留電話，我們睇完資料再回覆佢。呢個自稱李太嘅女士非常「順攤」，馬上留下聯絡電話，仲覆述多次，叫Amy切記打返畀佢。
Amy即時call我講述來龍去脈，問我意見。我話：「首先你當然要跟返正常程序，覆返佢價錢。佢如果有興趣，就過去同佢收支票、寫合約。」結果出乎意料咁順利，李太聽到2,000萬元放售價（其實呢個價錢唔算平），仍然係嗰句「我要買咗間舖！」，於是我接手Amy個電話同李太直接對話：「冇問題！我哋會盡全力幫你買。首先，你位置喺邊？我哋過嚟同你搞手續。」李太約定我們一個小時後去某某酒樓，我倆快馬加鞭立即擬定合約，然後趕的士，成功提前十分鐘到達。其時原來李生李太早已開定位「恭候大駕」，我們先打個招呼自我介紹，其後寫合約、簽名、俾支票「落臨訂」一氣呵成後，我就忍唔住問兩位，「點解咁鍾情呢間舖，一定要買到？」
李太就搶住答：「其實我哋就係呢間舖隔離嘅業主，因為擺貨問題同而家放賣嘅余生鬥爭咗超過20年，每個星期都嗌大交！見佢前兩日突然間冇開門營業都有啲奇怪，亦樂得清靜。前一天突然早上見間舖前有塊板掛出嚟話放賣，我哋就馬上打電話俾你哋，決心要買咗間舖，咁以後都唔使見到呢個人（余生）！如果遲出手而畀其他人買咗，日後唔知又會唔會因為擺貨問題而同人哋鬧交，所以唔理2,000萬貴定平，寧願買咗佢算啦，以後可以安安樂樂！」聽李太講完之後，我們總算放下心頭大石，起碼對方唔係「玩玩下」，代理最驚簽完合約之後又彈票，從頭到尾只係想「搞搞震」嘅「假買家」。
跟李生李太完成手續，我們爭分奪秒馬上約業主余生見面，指有重要消息同佢傾。余生係一個好直率嘅人，一定要你講清楚做乜事先至肯畀時間見我哋，結果（又囈又拜）終於爭取到個時間同佢見面。諗住單買賣「實食冇黐牙」，點知佢聽到話有個客畀到價，仲剛剛收咗票簽埋合約，只差佢簽名呢一步就搞掂哂，余生第一時間講：「我賣畀任何人都得，但千萬唔可以賣畀隔離嗰個姓李嘅，畀我知道係佢買，一定告到你甩褲！」
難題嚟啦！因為我們係雙邊代理，EAA規定如果業主要求知道買家是誰，我們必須透露。Amy馬上面色大變，口震震有口難言 ⋯⋯
睇緊文章嘅你，遇到咁情況又會點做呢？欲知後事如何，請看下期揭盅。
鄭得明 利嘉閣地產商舖部高級營業董事
——————
