筆者在地產業打滾多年，見盡行內各類人物。有啲「身光頸靚」，外貌專業到不得了嘅經紀，實質外強中乾，長期冇數，被行內戲稱為「蛋哥」（一直捧蛋）；相反，有啲相貌平凡，行事打扮非常低調，卻定期爆大數，所謂「悶聲發大財」嘅就係呢種人，但也屬百裡挑三的少數精英，超過九成嘅都係間中開一張單，叫做可以過到生活嘅地產人。
回望十多年前，我仍做主管嘅時代，請咗一個令我印象深刻、非常獨特嘅夥計，在此不妨同大家分享下我哋之間嘅故事。
話說某天我接到一位叫Marco的求職電話，以下簡稱M：
我：多謝你來電，想了解下你以前做過舖位代理未？
M：未，但而家做緊住宅，做咗超過五年了。
我：非常好，有地產經驗應該應付到，今天下午可有時間見面？
M：唔得呀，下午要接個女放學。
我：Ok，冇問題，就你時間方便。
M：明早9點啦，我10點鐘要返到公司。
我心裡打左個突：吓？晨早見工冇問題，但就算準時到，傾一陣就要趕返公司，扣減車程時間，最多咪填張form，難道你一路填一路傾？！心諗呢個人都有啲奇怪。算吧，冇所謂啦，反正每朝我都係9點前返到公司做定當天嘅預備工作，就9點會一會你！於是會面就此敲定了。
鏡頭一轉，翌日大家準時到咗茶餐廳，交換卡片後爭取時間對話：
我：想了解下你轉嚟做舖嘅原因？
M：實不相瞞，我太太係國內人，未夠期來港，而家得我照顧住個女先，媽咪間唔中會嚟幫忙。做住宅嘅工時太長，聽聞舖位返5日半同放銀行假期，時間比較啱我，所以想轉過嚟做。講明先，我好獨立嘅！返工一定交到數畀你，我要養家，唔使捽我，如果兩個月內冇數我馬上起身，但聲明一點，我習慣晏晝主動出擊去見客cold call，間中有時要接女放學，講明先好啲。咁你接唔接受呀？
我：坦白！我鍾意！冇問題，最緊要提出嚟大家夾。目標係搵錢呢樣嘢我哋肯定係一致嘅，咁你需時幾耐先可以埋位返工？
M：我今日返去辭職，後天就可以了。
Marco果然快人快語，即講即做。
話咁快Marco返左工一星期，期間冇乜同其他同事交流，淨係影印咗好多舖位proposal在自己座位埋頭研究，每到晏晝就走咗出去，一大疊文件幾乎佔用晒大半枱面。坐隔離的同事經常有微言，覺得亂七八糟，髒兮兮的，又自言自語聲稱最近開唔到單，好大原因就係Marco影響到磁場。
「你真係確定原因係咁？」我質疑問。
「我只係信數據啫，Marco未返工前你條數已經唔係幾好喎，任何事首先要從自身找原因，不要總是賴其他人。
你望下我個位，只會比Marco更亂，全部都係文件，我覺得咁先係做嘢，你幾可見到一個好努力工作嘅人，檯面係好簡約整整齊齊，乾乾淨淨嘅？！斷捨離只係適合無欲無求嘅人，即是退休人士。
大家應該著眼新同事帶來新嘅工作模式，唔係聚焦在佢冇同大家溝通吹水，或檯面凌亂之類嘅事情，我只信結果。做呢行各師各法達者為先，《實踐是檢驗真理的唯一標準》！又睇下今個月佢開單先定你哋幾個開單先？」我警剔各同事。
第二個星期，Marco 毫無先兆地簽咗單幾萬元嘅租務生意，以行動刮咗啲舊同事一巴。驚喜之餘我馬上了解下是怎樣促成嘅？
「個客係我做住宅時，去附近餐廳食飯時認識的老闆。佢生意一向非常好，我就喺佢附近搵咗個靚租盤，畀佢考慮開多間分店，咁就成功咗了！」Marco輕鬆地回答。
「咁強！難道佢係傳說中嘅開單機器？」我心諗。
「醒目仔，如果對個別舖位有疑問記得問我先，可以節省時間，亦唔使單打獨鬥。」我說。
「Ok，知道了。但我出道5年，習慣自己搞掂嘅！」Marco信心滿滿。
又過咗兩天，Marco返到公司滿臉笑容望住我，原來又簽左一間位於元朗嘅細舖位買賣，成交價560萬，仲收足佣金，佢說：「早知一早做舖位經紀啦，開單係咁easy嘅！」
我好開心佢轉型成功，搵到錢之餘仲照顧到屋企，但晴天霹靂，原來「福無重至，禍不單行」係真嘅…
到底發生咩事？留待下期揭曉。
鄭得明 利嘉閣地產商舖部高級營業董事
——————
