上回講到，我正慶幸有「開單機器」加盟舖位部，入職唔夠半個月，已經開左兩張單，但原來「驕兵必敗」的道理，真係要時刻警惕在心……
話說又過咗兩天，Marco近黃昏突然返公司，焦急地衝入我房。我有啲愕然深感不妙，佢坐低後馬上講：「老細，我呢次奶咗嘢！」我叫佢冷靜下來慢慢講清楚。
「前兩日我做嗰單買賣，我以為係小巷單邊（即是舖面向兩邊街）嗰間，原來我搞錯咗個舖，剛剛購入嘅係單邊隔離，中間嗰間，買方A先生發現後大發雷霆，聲稱要告我同埋公司，並索償一切損失。」Marco面帶難色說。
我拍一拍佢，輕聲說：「首先唔好驚慌，有幾個解決方法嘅。第一，你將件事清清楚楚同個賣方講，買方睇錯舖，睇佢肯唔肯取消交易並退回支票或費用，呢個當然最理想啦。第二，你周圍搵下有冇客肯接新買家A先生個舖位摸貨，幫佢平手或者賺少少錢走，（因為當時釐印費可以交易當日才繳交，所以成交期內無論摸售幾多轉，都係最終買方才需繳付，成本只需律師費、經紀佣金）呢個係最圓滿解決問題方案，亦係最困難嘅方法。其次係有客人接貨，但蝕讓少少摸出，起碼損失程度我哋內部可以管控到。第三，假使業主唔肯退訂，可否簽取消交易協議，唔再追究買方A先生要強制交易？（因為簽訂舖位臨時買賣合約，通常都係必買必賣）呢樣可以將我哋公司嘅損失，減低到可能只係賠償臨時訂金價錢。」
Marco聽完後終於冷靜落嚟，回答道：「知道老細！原來仲有幾個方法可以解決！咁我首先聯絡賣方睇下可唔可以取消交易，如果唔得，就用第二方法，將個舖當獨家去做，周圍『放摸』，如果都唔得先用減低損失嘅第三方法，咁我呢幾日時間全力做呢件嘢先！」
第二天Marco報告我說，佢已經周旋了一整天，賣方堅決地不考慮退回臨時訂金15萬元予買方A先生，但可以當撻訂處理，大家只需要約時間簽返份取消交易協議，算係壞消息中嘅好消息，起碼可以鎖定部門損失最多係15萬元。
我再叮囑Marco：「你要把握時間，趁呢兩天盡力去推呢間獨家舖。象徵式加10至20萬價錢，如果有買家接貨，直情做多單兼夾收兩轉佣金添！」佢雙眼發光：「係喎！焦點淨係諗住取消交易，冇諗象徵式摸售呢一個方法添，我馬上去做！」Marco即刻跑去影印機狂印宣傳紙，準備行動。
第二天晚上我剛剛回到家，突然電話響起，對方好急速地講：「老細，我係Marco，皇天不負有心人，好開心呀！我搵到個買家B先生肯照成交價（560萬）加40萬接個舖，啱啱仲收埋票簽咗臨時合約，但新業主A先生回覆今晚唔得閒，約咗明早10點見面，我未話佢知有人接手畀錢佢賺，A先生以為係出嚟搞取消手續，明天畀個surprise佢，睇下驚喜之下會唔會俾高啲佣金！」
「真叻仔！最難搞嗰樣都俾你搞掂！」，我好興奮地回答佢。
話咁快第二天，Marco同我到達約定餐廳，剛剛坐低，A先生同太太就到咗，大家叫完早餐後，A冷淡地問Marco：「係咪而家可以簽訂取消協議收返錢了？」我哋笑容滿面，Marco搶答：「首先恭喜老闆接財神！既然老闆唔鍾意間舖，我哋馬上搵到客，照你買入價再加40萬港幣『接摸』！」，誇張地表達同時拎出合約連支票給A先生，並說：「你簽個名落去即刻賺40萬！我哋做到嘢，佣金方面可唔可以畀高啲作為獎勵？」
A先生聽後呆呆地望住份合約冇乜反應，同太太對望一眼後說：「我同太太商量下先，你哋5分鐘後再返嚟。」我哋識趣地迴避，一枝煙嘅時間轉眼過去，Ａ先生的面容亦變得快過川劇，向我哋笑笑口說：「多謝你介紹個舖畀我，而家有人畀多40萬接貨，證明都係好嘢嚟，我哋傾過都係照去馬，作長線收租算了。呢餐我嘅隨便叫！」簡直晴天霹靂！我同Marco都唔知畀咩表情好了，最後連收少啲佣金呢招出埋對方都唔考慮，結果無功而還。
「向好嘅方面諗，都叫做settle咗件事，唯有退返票畀你個貴客B先生，再幫佢喺附近搵個舖啦！」我安慰Marco，「你個客咁好人，打鐵趁熱呢兩天快啲做多單！」。「唯有係咁啦！」Marco略為收拾心情，「我搵定兩個差不多價錢舖位才退票畀B先生。」
再過兩天，Marco彈跳著返公司拉我入房，興奮地說：「補中成功！B先生跟我買咗個舖位，成交價600萬，個租客做美容，舖形超級大隻。B先生一睇就好滿意，5分鐘後即時收票，業主在附近住，馬上call佢落嚟簽約，由睇舖到簽妥合約全程一小時內搞掂！火雲邪神話齋『唯快不破』！」聽後我心諗：點解有個舖咁靚我唔知嘅？不過言語上當然要先道喜：「恭喜晒你先，不如你畀個地址我望下邊間先？」Marco即時拿出臨時合約，看後我說：「呢個美容租客係用緊4號舖同5號舖，分別唔同業主持有，你今次只係買其中一個4號舖，B先生清楚嗎？」
Marco雙目睜大，口震震喃喃自語話：「冇可能嘅，難道又再一次搞錯？！」我再三睇過份合約，果然又搞錯咗，我說：「唔使我講，你應該知點去做啦？」「知道了，照上個case果3個解決方法搞多次！」Marco 立即回答。
可是今次冇咁幸運了，搵唔到人接「摸貨」，點都要硬著頭皮同B先生講返成件事，B先生實在太好人，佢都覺得咁闊面嘅舖無理由咁平，研究過平面圖之後，佢覺得淨係買4號舖都接受到，可以照成交，竟然又符碌過關。不過自此之後Marco冇晒信心，做嘢亦無精打采。我請佢入房傾偈，探究下佢心態如何。結果佢話：「我諗住成交埋呢兩單生意就辭職啦！開頭以為舖位好容易做，原來易學難精，要嘥太多時間去研究，否則分分鐘買錯舖要賠到破產。我都係做返住宅算了，相對簡單好多，肯定唔會買錯住宅，謝謝你幫我！」我挽留佢：「不如試多一段時間再考慮轉場問題？」但Marco好堅決，一諗走就唔想留，唯有預祝Marco在住宅代理界闖出一片天！
後記：後來在行家口中得知，Marco重返住宅界後業績相當好，屢屢獲獎，太太亦夠期可以來港定居，一家三口不用再分隔兩地，生活幸福愜意。
完
鄭得明 利嘉閣地產商舖部高級營業董事
上回重溫：
