老友frankie覺得近期股票市場太波動，想轉錢去投資磚頭保值，急需一個有能力嘅經紀幫手，但坊間地產經紀良莠不齊，問我怎樣去衡量一個地產代理嘅功力深淺？
「最簡單直接就係收卡片嘅一刻，如果你見經紀卡片上全部都係獎項，佢係屬於搵到錢嗰兩成人，行業內叫有成就。尤其銷售獎項中最Top嘅就係『金鷹』，例如我哋公司前線有2,700人，只係得營業額最高嘅頭五名才有資格攞到金鷹榮譽。正如大家嘅童年回憶『七龍珠』，悟空變為超級撒亞人都係轉金色頭髮一樣。」我簡淺地回答佢。
今次要分享嘅正正就係金鷹得主，舖位界的傳奇人物──Pat Yip。相信從事舖位界嘅代理，有九成人就算未見過面，都聽過名字，事關佢係舖位界「女Deal后」！
初次認識Pat嘅時候係2011年經朋友介紹。外貌有點像鍾麗緹的Pat姐，前身做電話營銷時，已經係cold call女王。當時剛加入舖位行業半年，在某大行工作，因為個個月有開單，已經薄有名氣，後來因為家庭緣故停工3年，經我三顧草廬，終首肯在2014年正式合作。
加盟第一天已經感覺到Pat嘅殺氣和對開單嘅渴求，她經常衝入嚟我房問：「呢件舖點睇？有冇得搞？」、「嗰間舖有冇人啱？」、「有冇邊條街啲舖好多人要？」等等。返工只係幾小時，已經搵咗3個長期不放售嘅舖位出嚟畀我「秤」下價錢抵唔抵、分析箇中優點同缺點，教佢點sell，佢就識得用自己嘅方式去感染到其他人，冇理會該區佢熟唔熟。
第二天早上，Pat衝過嚟搵我講：「昨日我打畀經常買舖嗰位鍾姓投資者，佢睇好利東街正值重建的契機，想在附近搵啲5,000萬左右嘅舖位博升值，如果搵到咁嘅價錢佢即刻買，你畀啲意見我搵邊條街cold call好？」
「圍住呢條街嘅太原街、皇東、莊士敦道同埋廈門街都可以，甚至乎再隔多條街添，只要價錢啱的話，但已經有幾個投資者不停搵緊都未有舖出。」我第一時間答佢。
「OK 馬上搵！」，Pat一溜煙出咗去睇電腦，即時進入「搵盤自閉症mode」，懶理身邊發生任何事，深潛在自己嘅世界。下午，Pat又走嚟同我講：「報告！call晒呢四條街了，一係唔賣，一係就要超高價兼夾唔確實賣嘅，我搵到其中一個舖主叫梁伯，佢好好禮貌，但係話自用緊唔會放賣。橫掂都冇盤放，不如落去舖頭搵佢試下會否有轉機？」
「好呀，行動勝於一切！」我鼓勵她。
話咁快已去到舖頭，「Hello，請問你係咪梁伯呀？我係剛才打電話嚟畀你嗰位葉小姐，我咁啱在附近見完客，過嚟畀張卡片你！」Pat笑笑口打招呼。
「多謝你先，不過暫時唔會賣住啦，怕浪費你時間。」梁伯微笑回應。
Pat熱情地答：「我哋還未食飯，不如請你過隔嚟飲杯嘢傾下偈好嗎？」
「咁好啦。」梁伯還是笑容可掬。
「老闆，我哋知利東街重建影響埋你哋呢條街，搞到而家咁多灰塵，又大噪音，見到好多行人都行去隔離街出入，係咪影響到你生意呀？」Pat問。
梁伯：「有小小影響嘅，不過自己舖，壓力冇咁大，多謝你關心。」
Pat：「其實你哋呢代人辛苦咗大半世，應該交棒畀年輕人做啦！」
梁伯笑笑口講：「我仔唔肯做呢行，寧願出去返投資銀行，話學有所用。」
Pat窮追不捨：「我睇呢條街仲有兩、三年靜嘅，我而家有個實客，真係想買一間舖睇長遠少少，用來分散投資，佢願意出5,000萬嚟同你買，交吉定連售後租回都冇所謂，你點睇呀？」
梁伯：「唔係錢問題，我根本完全冇諗過賣舖，5,000萬對我嚟講，只係數字，人最緊要都係搵兩餐飯啫，我信佛嘅，一切隨緣，時間差唔多，我要返過舖頭啦，呢餐我請，你哋慢慢坐啦。」
Pat馬上飲埋杯咖啡企起身：「我哋都食飽啦，過嚟你舖頭再傾陣先，剛才企你隔離嗰位貴氣女士係咪你太太呀？」
梁伯：「係呀，你哋唔好同佢講賣舖嘅事，佢脾氣比較大，請你哋唔好介意。」
「冇問題！」Pat邊回應邊行入舖內，竟然第一時間衝前打招呼：「梁太你好，我姓葉嘅，剛剛同你先生傾開話舖頭生意差咗，其實你哋會唔會計劃退休，賣咗間舖去嘆世界？請唔好介意，因為我有個客想用5,000萬高價幫你買入呢間舖。」
梁太馬上叉住腰問：「我哋大把錢，點解要賣咗間舖頭畀你呢，你答我？你哋好走啦，一陣我個仔返嚟，分分鐘報警話你強迫我哋賣舖㗎！」
「梁太，其實我哋係財神化身，為你運財而來，我知道而家你哋每日都係冇乜錢賺，梁伯好精神，不如趁年輕留多啲時間去享受人生。」我笑笑口解釋。
梁太聽完仍然皺眉，對眼望住攤開雙手嘅梁伯。梁伯急忙澄清：「我冇應承佢㗎！」
就在此時，一位非常高大健碩的青年出現門口，「兩位乜嘢事圍住我爸爸媽媽？」原來係佢兒子阿Paul。簡單理解完件事後，他語帶不善地說：「我哋唔賣，你哋好走啦，如果唔係我報警。」
Pat冇理會繼續同梁太遊說放售，Paul即時打電話報警：「喂，請你馬上叫警察嚟，我哋舖頭而家有人騷擾我哋……」
遊說業主賣舖，搞到報警咁大件事！欲知單嘢點收科，請留意下集！
鄭得明 利嘉閣地產商舖部高級營業董事
