上回講到Pat扯單扯到業主個仔阿Paul要報警趕人。面對如此情境，Pat面不改容老實不客氣地坐在舖內的工作房間，繼續游說梁伯：「呢間舖今日攞出嚟放租，只係租到5萬元……」，話未說完，就有兩個警察急步走入來問邊個報警？Paul：「係我，呢兩個經紀走入嚟騷擾我哋！」
經過5分鐘初步了解後，警察表示：「佢哋冇威脅到你安全，呢啲商業事情我哋管唔到，如果再有乜嘢先打畀我哋啦！」Paul無奈地送走兩個警察，不久後自己亦離開：「我走先，如果佢哋再唔肯走你哋話我聽。」 對父母說罷便一溜煙走咗。
我趁機走過隔離7-11打畀鍾生話：「老闆有機會，請你火速揸車過嚟灣仔簽定合約同畀支票我先。」跟手買咗幾支飲料再返入舖，只見到梁太眉頭深鎖，望住正喋喋不休嘅阿Pat並冇出聲。20分鐘後我見時間差不多，藉口「人有三急」走出舖外面，搵鍾生簽訂合約，跟住箭步回來。
近兩小時後阿Paul又返轉頭，驚訝說：「你哋竟然仲未走！我又報警搵人拉你！」如是者10分鐘後，之前出現的兩個警察入嚟就問：「又乜嘢情況？」知道後說：「我哋真係做唔到嘢。」，然後轉向我講：「不如請你兩位先離開好嗎？」Pat豈肯輕易罷休：「阿Sir其實冇嘢呀，我同梁伯佢哋傾緊商業買賣啫，傾好我就走啦，你唔信問梁伯。」Pat用眼神望向梁伯方向。
梁伯即時表示：「佢哋冇威脅我，只係話畀我聽有人想同我買舖啫。」「咁我哋收隊啦！」，阿Sir邊行邊回應。
梁太黑晒面話：「我冇你哋咁好氣，成9點鐘飯都未食，我上樓同個仔食飯先啦！」之後就氣呼呼出咗門口。
梁伯微笑話：「不如你哋走先啦，我哋一家人再慢慢商量下。」
「你聽埋我分析咗先啦，請唔好走住！」，Pat動之以情：「你而家呢間舖頭個仔又唔肯接手，兩公婆每日都要做，變咗退休計劃遙遙無期。我觀察到你公子年輕有為仍然係同你住，應該仲未置業，不如套現買層樓畀佢仲好，起碼你哋盡咗做父母嘅責任。」
梁伯似乎若有所思，此時我亦幫忙游說：「梁伯，巧合地我都係信佛嘅，今日我哋嚟到同你見面都係緣份到，你當放下吧，當幫下自己又好，太太又好，梁伯你咁好人，活脫脫係一個高僧轉世，如果佛無情，便不會起普渡眾生之心了。我哋普通人係靠勤勞搵呢碗飯食，你緊握拳頭抓住呢間舖，佛學方面叫做「貪」，等於過份偏執，反而張開雙手，你會擁有全世界，放下自在吧梁施主。」
梁伯聽完冇出聲正在思考，Pat再續落去道：「你賣咗套現，有三贏。第一，阿Paul有咗物業有自己嘅世界；第二，你上半生為社會做咗咁多建設，責任已經完晒，係時候做自己喜歡嘅事了；第三，放過埋你太太，等佢唔使同你一齊捱，令到佢可以過到休閒嘅生活。」
「你講嘅嘢都有道理，啟發咗我一啲新嘅諗法。認真想一想，5,000萬呢個數目在今天其實好滿意，就算再賣貴少少錢對我嚟講分別唔係太大。今日見你兩位總算有緣份，我就簽畀你啦！」。當合約簽妥後，送埋梁伯上樓後，已經近11時了，大家都唔敢相信，竟然返工第2天就已經開單成功，共收佣金100萬元。極速送回合約給鍾先生報喜，達成三win局面。
後續：當完成晒舖位交易後，梁伯經我哋介紹，買咗個寶馬山花園提升生活，同太太日日行山飲茶，過得非常寫意。期間佢兒子阿Paul竟然主動打畀我哋，希望能幫佢搵間house自住。「多謝晒你先，乜你唔係應該好憎我哋咩？」Pat驚喜之餘連隨問佢。
「因為覺得你夠chur又有活力，應該可以幫到我搵需要嘅嘢。」Paul好nice回應。大家閒談間佢主動講：「如果唔係你哋挾我爸爸賣舖，我都冇諗過佢哋已經年紀大，真係需要退休。所以想返起呢件事，都要多謝你哋兩位嘅堅持。眼見佢哋而家活得好開心自在，我都好快樂。」結果我哋好快幫佢買咗間青山公路嘅一手洋房，往後同佢一家人間中都有飲茶見面，做埋好朋友添。
鄭得明 利嘉閣地產商舖部高級營業董事
