世事何曾是絕對！
行衰運是否一定壞事？有些人總要經歷一連串挫折，才能「鳳凰涅盤，浴火重生」！藉着新一年開始分享一個故事：
每逢年頭，地產公司都會舉辦盛大嘅頒獎典禮，公佈過去一年前線營業員嘅業績，並向傑出代理授予各類獎項和禮物，表揚他們去年的優異成績，同時亦會邀請三位飛躍進步嘅代理上台分享成功心得。
何雪森Snow(化名)就是三位受邀請中首先上台分享嘅代理。
望着台下約三千多對期待的眼神，Snow感受到過去一年的努力沒有白費。站在舞台中心位置，道出自己故事，心情也異常激動。他先深呼吸一口氣，然後吐出第一句話：「多謝逆境，有時上天要你經歷逆境，係要激發你嘅潛能，發揮你嘅能力。生於憂患，死於安樂，安逸會令人退化，唯有不斷接受挑戰，才能盡展你嘅所長……」
此時耳中傳來熱烈的掌聲，Snow抬頭望向天花上熠熠生輝的射燈，彷彿轉眼間，時間穿越到一年多前的晚上……
Snow同樣地望向大廈招牌上的射燈，在街上漫無目的，行屍走肉般遊走，心中在圍繞着：究竟呢幾個月發生乜嘢事？點解突然間連基本生活費都成問題？
Snow喃喃自語，電燈柱彷似成為他的傾訴對象：「從事逾10年舖位代理嘅我，生活穩定又愉快，平均每月做張幾萬蚊租務，連埋底薪每月三、四萬蚊夠晒開支，加上與父母一起住在公屋，並冇供樓支出負擔，太太全職在家湊女兒，晚晚家裡都非常熱鬧，充滿笑聲。
但幾個月前某一天，媽媽突然在街上中風跌倒，在醫院臥床個多月，行動不便，父親年邁，唔夠精力照顧，出院後唯有暫時搬去護老中心。倒霉事通常一不離二，因為長期抽煙和缺乏運動關係，個多月前父親感到身體不適，在一次例行檢查，發現有肺癌，幸好發現得早，現正在治療當中，一下子大幅度增加支出，令平時餐搵餐食嘅我壓力空前巨大，加上每晚放工仍要探媽媽和照顧父親，長期唔夠睡眠之下，影響埋日間工作。我已經連續三個月冇開單，真係極度缺錢。」
Snow 回憶往事，繼續分享：「那時候我真的十分後悔，突然諗返起之前主管經常勸大家『花無百日紅』，趁好天搵埋落雨柴，當時當耳邊風，心裡諗而家快快活活，輕輕鬆鬆幾好，每月快靚正開張租單，屋企就夠維皮，如果搵多咗錢就要交稅，一旦收入增加咗，到時可能連公屋都冇資格住仲麻煩。
忽然間眼前浮現出主管分享過呢篇內容畫面，題目係《七個問題，讓你瞬間覺醒》：
1.你今年多大了？
2.你父母多大了？
3.錢夠用嗎？
4.假如父母生病需要一筆錢看病，你拿得出來嗎？
5.能給你的愛人理想的生活嗎？
6.能給孩子最優質的教育條件嗎？
7.對於以上問題，你感到恐懼嗎？
每當你想放棄的時候，問問自己這些問題，你會瞬間充滿力量。
內容簡直同我度身訂做一樣，正正將我喚醒，就算再後悔都解決唔到問題，一定要狠下決心應對呢個難關。
以前睇過一本書，內容大意話，如果你本身已經失咗方寸，最好嘅方法係搵一個平靜嘅地方思考兩天，今後條路應該點行，如果仍未諗通就繼續諗，直至有咗決定就要猛下決心去做。
坐言起行，我馬上搭船過大嶼山某酒店，租咗間向海景房，坐在房間內望住海面洗滌心靈，計劃一下之後方向。
三日後我返回屋企，向老婆和爸爸承諾，會傾盡全力維持全家經濟支出，大家不用擔心。
首要解決嘅係財政問題，明白今次點都要放下面子，懇請親戚相借一筆50萬款項作中期開支周轉，暫時解決財政問題，然後行B (busy)計劃：
1.請主管幫忙制定搵錢目標
2.向部門top sales請教開單方法和模仿工作方式
3.邀約埋工業、商業部Top sales同事食飯，了解下佢哋嘅工作範疇和點去達致成功
綜合晒以上tips和分享，定好搵大錢的工作方向，今後專攻舖市買賣。以前聽唔入耳嘅工作模式，今後要用鐵血軍人方式去完成。例如每天都有賣咗嘅舖位成交資訊出現，向自己承諾一定要打足全部電話，恭喜剛購入新買家有眼光買到靚貨，亦向賣出咗嘅舊舖主道賀賣到好價錢；如果啱傾嘅，就每兩天都要跟一次電話，務求混熟為止，再篩選有潛力貴客積極畀筍盤，簡單事情重複做，日積月累一定有成果。
借鑒寫字樓部的工作方式嚟做舖──勤力的寫字樓代理日常工作，需要每天上門拜訪業主或見客，我照板煮碗套用在舖位的投資貴客，只要知道『有潛力』的客和業主的地址，就必定買西餅之類上去佢公司見面派卡片套交情，藉着大時大節例如中秋、聖誕，就送應景小禮物上去碰面傾偈，農曆新年前去深水埗，買定成批可愛生肖和財神毛公仔一對送畀客戶，往往會有很多意想不到嘅效果出現。
我亦參照工商部top sales方法，以全幢買賣為主，藉着和工商部合作，攞一支支全幢工業推介畀房地產基金研究，又可以從基金對口人回覆得知，呢件貨有啲乜嘢優點和缺點，市場大約接受價錢等，從而了解深咗，對症下藥解決問題，深信堅持住最後會做到大Deal 生意嘅。」
霎眼間過咗一個月，Snow已經累積咗十個有潛力嘅新客，寫低咗佢哋嘅需求在記事簿上，每天早、午和收工前，第一時間查看有冇適合貴客嘅新放盤，如果有就第一時間打畀業主了解情況，再推畀客。
話咁快兩個月之後，Snow已經做咗一單4,000萬嘅買賣，成功後自然信心大增，加多兩成動力繼續推，重複的事情用心做，轉眼間一年過去，全年計數總共做咗500多萬佣金，直接落袋近180萬，解決晒財務問題。越努力越幸運，順境時通常好事成雙，Snow的媽媽在老人院積極做康復運動，健康大為改善，孝順的他第一時間接媽媽回家，同時聘請外傭返來照顧兩老生活所需，其爸爸經歷一系列電療下，病情亦已接近康復。Snow着手計劃下年將會自置物業改善生活環境，脫離公屋行列，公司亦察覺Snow一年內有飛快進步，所以誠邀他上台作出分享以上故事。當佢分享完一年前至今的高山低谷軍訓式歷程後，投入的觀眾鴉雀無聲，仍在Snow所經歷的真實故事中徘徊，久久未能抽離……
「我想問大家，今天定位了嗎？」Show突然吐出一句，令台下所有人的焦點重新集中在他身上。「我有幸睇過一篇文章得到啟發，內容說，人很容易走神迷失方向，昨天和今天的你，想法肯定有點不一樣，所以每天都要自己重新定位一次，正如我的汽車導航每天都會『系統重新定位中』，它同時提醒了我，每天都要重新校正定位。等於中國古代智慧名言，『吾日三省吾身』。人習慣遇到一些事總住壞處方面諗，所以有『福無重至，禍不單行』呢啲負面語，我深深覺得『境由心轉，好事成雙』才是做人正確態度。」
Snow 將其過去一年多的血與淚，濃縮成這15分鐘的精華。
趁住農曆新春，小弟向大家拜個好年，祝賀大家：虎氣沖天、如龍似虎、如虎添翼、龍騰虎躍、龍精虎猛、生龍活虎。
鄭得明 利嘉閣地產商舖部高級營業董事
