開舖接連兩個月都有大盈利，我哋3個股東決定乘勝追擊開分店！商量緊分店選址時，剛巧當時有朋友因為貪平，買咗天水圍嘉湖山莊1個單位。大家都有興趣想了解天水圍係咩環境，搞地產有冇得做？當年天水圍嘅交通相當不便，由荃灣去天水圍只得城巴，單程要個幾鐘頭（仲要屯門公路冇塞車的話）。除咗城巴、的士外，都冇乜交通工具去了。一到晚上，感覺半封城一樣，但樓價真係平，每呎只需1,600多元起。
嘉湖山莊商場部份當時由發展商持有（後來賣畀日資再轉售予資深投資者），如果要租地舖做地產會好貴租。大家視察環境抬頭睇物業外觀時，發現原來好多樓上低層住宅地產代理公司用嚟做生意，全部窗口都掛住地產招牌「歡迎查詢」，只需要另外請人喺街「撈客」上樓就可以。
一問之下，我哋驚覺原來2,000多元租金就租到三房單位！一計成本咁輕，我哋馬上拍板天水圍作為第二間店舖選址！此時剛加入做股東嘅Joe主動要求，由佢負責租舖、裝修、安裝電話設備等，並統籌新店一切事宜。佢指於天水圍太遙遠，佢單身冇負擔，所以由佢做開荒牛比較適合，佢亦打算在上址白天開工，晚上住埋大搏殺，以行動回報我哋畀佢先入股再還資金。股東們冇異議，並即時進行大計。
除咗第一個月剛開張有虧損而要額外投入資金，第二個月已開始有微利，亦開始摸索到運作模式。嘉湖山莊的特色是星期一至四冇乜客人，五、六、日才有人來天水圍放盤或睇樓。 Joe只係請咗4個全職從業員平時打電話update樓盤，但一到周末日忙到「踢晒腳」唔夠人做嘢，就馬上變陣搵多幾個高高大大嘅朋友做兼職，逢星期六、日在街上「拉客」上樓，了解下對方想要咩類型單位，並負責帶去睇樓，等全職同事可以專心在單位內接客、傾價、簽單。結果呢條橋又行得通喎，就決定一路複製落去，並計劃每兩個月左右就開一間舖。
正當計劃開第三間舖選址在荃豐中心商場時，死黨（兼股東之一）William突然誇獎我：「Dennis，公司咁快上到軌道，全靠你出謀獻計和財力支持，有啲伙記覺得你背景好神秘，橫掂你主力都喺度炒緊住宅樓，咁不如你唔好再喺公司坐鎮，退一步做個高高在上嘅神秘老闆，集中管理公司嘅政策發展，前線嘅嘢等我同Joe兩個去搞。咁樣既可以震懾員工，又可以多個位提拔新人開新舖培養做管理層。」我表示咁對佢兩個唔公平， Joe話唔使擔心，有個神秘老闆更方便管理員工，又可以吹大背後財力，Willam又勸說道，決策若需要雷厲風行，又可以卸落「老闆決定」，可以更易推行。
既然兩位股東都口徑一致，我亦不虞有詐，心諗做得滴血兄弟，佢哋都係想公司好，我更樂得清靜。如是者一星期返去望下業績，同員工傾下偈，了解下情況，每半個月簽定超過20張冇填銀碼支票，作為月中出佣金及月尾出糧，如果公司唔夠錢就由我先存入現金墊支，日後有佣金返再計數收返錢。所謂「生於憂患死於安樂」，當一切看似風平浪靜順風順水的時候，沒想到其實卻暗湧深藏，只待爆發⋯⋯
鄭得明 利嘉閣地產商舖部高級營業董事
——————
