Wincy（化名），一個外貌清純的女子。回望四年前香港大學畢業禮上，這位滿臉稚氣、頭帶四方帽的小妮子，笑着領取她引以為傲的畢業證書。一向是「學霸」的她，成績自然相當理想，證明努力學習沒有白費。性格斯文加上辦事有條理的她，原本夢想加入投行，但由於社運再加上疫情問題，暫時沒有合適的工作。自幼目睹爺爺一手建立房地產建築生意的關係，Wincy早已熟悉關於房地產範疇的基本事宜。媽媽見她賦閒在家，建議既然暫時未有第一志願的工作，不如嘗試向房地產銷售發展，先由地產代理去了解這行業的情況和運作模式。
「將來家族的建築生意都是由妳去接手，到時可盡情發揮創意與能力。由最初設計到竣工銷售，都是妳一手策劃，係幾咁完美嘅一件事！現在先入地產行汲取經驗，仲可以證明畀人睇讀書叻，做邊行都可以出頭！」媽媽鼓勵她說。
Wincy覺得有道理，坐言起行馬上去見工。想到在熟悉的地方開始會較易上手，就決定在附近的地產公司開始工作。轉眼經過一年的磨練，她已經掌握到住宅地產的一套────不停睇樓、還價就有收成，年終亦成功打入公司前列並順利攞獎。當知道舖位代理所服務的老闆，是整個房地產市場最有實力和對sales知識要求最高嘅，為挑戰自己能力，毅然轉做商舖代理。
基於之前與一位舖位部的同事合作成功緣故，經他介紹下Wincy順利轉組到舖位部。起初因為不熟悉的關係，她先力攻租務市場。經過一段短時間適應，順利每個月都開到租單，在同事鼓動之下，Wincy開始涉足舖位買賣，過程亦有「蝦碌」撞過板，不過她勇於求教主管和師兄，多想解決方案，慢慢掌握到買賣技巧。由於性格談吐斯文和有條理，受到部份買家的欣賞，開始做到串燒買賣（即是連做兩宗買賣成交），逐漸累積到一定捧場熟客。期間Wincy目睹部門戰神Deal后P經常連環成交幾單買賣，佩服之餘亦暗暗定下挑戰目標對象。
年半前，Wincy立下2021年超高難度目標：挑戰已經連續8年部門第一名嘅Deal后P小姐！夢想要戰勝神一般對手，Wincy極有大志，但不知用從何入手。他的上司和師兄教她一個方法：每天留意P小姐的工作動向。Wincy坦白道出：「我冇佢工作速度咁快同爆發力，加上P說話有一種令貴客不能拒絕的魅力去推動成交。」
記得有一次P突然行過嚟向Wincy說：「剛剛update大角咀業主金先生個舖，佢表示剛簽咗獨家代理給妳，我有個客可能啱，佢想下午3點睇，不如合作做吖？」Wincy：「OK呀，個舖業主自用緊，咁我同你一齊去打個招呼叫佢畀你望埋內籠。」P咬住香口膠答：「Good，咁早半小時一齊去。」「OK冇問題。」Wincy爽快回應。
近2時30分，Wincy行過去搵P諗住一齊出發，見到P在講電話，不停講，終於近3點鐘才收線，P跟住大叫：「出發啦！」「你最好同個客講聲遲啲先到好喎。」Wincy好意提醒佢。「去到先啦，我成日都係咁嘅！」P邊說邊飛快出咗門口……終於近3時30分到達目的地，遠遠已見到客人滿臉不耐煩翹着手、挨着欄桿，P見狀一個箭步衝過去微笑着說：「剛才好塞車呀，遲到添，我介紹下個舖先啦！邊說邊帶住客人左睇右睇。Wincy在旁觀察，個客竟然冇發脾氣喎，仲好認真聽着P介紹添。10分鐘後睇完，仲跟P小姐傾咗半小時才微笑着離去。驚嘆P真係有種令人不能拒絕的魅力。
師兄說：「這我一早知道，但妳總有其他強項吧，就利用本身強項去應對。」「強項？我最有自信的地方，就是我非常有耐性，亦有很強嘅分析優勢、劣勢能力，而且對每個客戶關係都經營得好好。」Wincy憶起自己都有過人之處。
經長期深入觀察下，Wincy發覺P經常在「爆數」後，突然間有一、兩個月會分心，之後有同事返大佣金，佢又馬上跑返一、兩條數返嚟。Wincy心諗：呢個就係機會，我嘅策略係用足12個月努力開單去對抗戰神P的6個月成功返數，一於就用「龜兔賽跑」嘅策略去做！
憑着一股追求勝利的慾望，Wincy馬上開Turbo加班。如此，一場得佢知，但P唔知嘅暗中比賽就正式開始！當一個人全力工作，時間過得特別快，第一季成績表出爐：
雖然宗數相差不遠，但佣金就有明顯距離。P大勝84萬！呢一場由只有4年地產資歷嘅「學霸」對「舖位戰神」的不對稱比賽，第一季已經輸咗咁多，Wincy係咪冇能力再追？定係會有出人意表的結果？欲知後事如何，請看下集。
鄭得明 利嘉閣地產商舖部高級營業董事
