首先我想大家思考一個問題：一對拍拖多年嘅男女終於結婚，旁觀嘅你，覺得咁樣係咪最幸福同完美嘅結局呢？同樣地，筆者與識於微時、最親密嘅好朋友一起創業奮鬥，結果又會係點？
上回講到，我哋開分行嘅事進行得如火如荼。轉眼間，落戶在荃豐中心嘅第三間舖頭裝修即將完工，我同兩位股東一齊去現場睇下進度，同時見下新分行經理。出乎意料，原來佢哋擢升咗一位滿臉稚氣、叫阿May（化名）嘅年輕女子。打招呼寒喧咗幾句，當佢行入店內視察傢俬時，我趁機同股東們了解下升佢嘅原因。Joe急忙說「信我啦」、「May 做嘢ok喎」，William則嚷着「好多投資者鍾意同佢傾偈」等等。
既然兩位股東都咁講，我都要信啦，於是就冇將呢件事放喺心，繼續扮演着「幕後神秘老闆」嘅角色，並過着每日搵樓炒嘅生活（呢樣仲快搵到錢）。
講到炒樓，認真「識人好過識字」，打好關係最為重要。每日我都會定時去各間細地產舖傾偈，買啲生果、西餅去孝敬sales，等佢有「低水樓」時第一個聯絡我。我仲會喺好幾間合作開嘅地產公司放低幾張支票，當有平貨時，我就可以用最快時間落訂買到。如是者我喺短時間內成功累積到一定財力。當時我心諗：「全靠自己才智過人，所以又開公司兼夾搵到錢，順風順水咁就一世。呢個世界邊有懷才不遇吖？只要你係叻嘅一定會出人頭地！」個人心態膨脹到不得了，直至大半個月後有一晚⋯⋯
公司有位「開荒牛」叫阿King（化名），做嘢好交帶好有幹勁，我同佢一向都幾好傾。有一晚佢打畀我，話剛剛給公司炒咗，想約我出嚟見面，話要爆啲料我知。一坐低佢就狂吐苦水，急不及待呻成間公司已經變晒形，分咗兩派山頭主義，仲懷疑William同兩位女同事亂搞男女關係：「兩個女同事成日喺公司爭風呷醋，又扮晒『事頭婆』，同事只要有比較實在嘅單要傾，William都會安排佢哋其中一個幫手，生意做成嘅話要分佣畀佢哋，好多同事都心生不滿，但上司又唔理，只係叫我哋做嘢唔好咁多事，搞到同事有單都唔輕易講出嚟，要自己偷偷去搞！」
佢又補充，早兩日自己有單買賣，但講明唔使佢哋幫手，間接引致最終俾公司「炒魷」。King見我最近好少返公司，所以提一提我，叫我小心。聽完之後我覺得根本無可能，William係老闆，點會搞咁多事出嚟？而且處事不公平最終會引致公司人心渙散，咁咪整散自己嘅親生仔？所以聽完之後我都冇咗件事。
不久後，我親戚個仔John想加入地產行業，知道我有做開，想我介紹下點樣可以入行。我就叫佢去我公司見工（但冇講畀佢知我有份投資，亦叫佢唔好同人講認識我），結果順利入咗職，之後我就每隔幾日同佢食飯，關心下佢工作進度、提點下佢，順道問下公司情況。我赫然驚覺，原來公司情況比我想像中惡劣很多，更令人痛心的是，原來好朋友，也不能共富貴⋯⋯
鄭得明 利嘉閣地產商舖部高級營業董事
——————
