居屋抽唔到，私樓買唔到，似乎是不少香港人寫照。今次主角曾太比較幸運，雖然今時今日成功上車，但過程絕不平坦，遇到的挫折可能你我都曾經歷過。
抽居屋抽足6年都不中，惟有寄望私樓，曾生曾太婚後為儲錢選擇「港式分居」，曾太感概：「抽過居屋幾次都抽唔中，都好無奈，冇辦法啦為咗儲錢，所以結婚第一年係分開住，但分開住係忙到冇得見面，可能大家一星期只會食到一餐飯。」
「港式分居」是香港近年越來越普及的現象，指夫婦結婚之後，依然維持分居的形式繼續生活。目的通常是為了加快儲錢速度，盡快上車。
新婚夫婦本應甜甜蜜蜜，但偏偏要港式分居，是無奈又是沒辦法的選擇，曾生曾太最後難解雙思之苦，分開住真的行不通，港式分居一年後他們決定租樓住：「 因為兩個人相處始終需要時間，如果平時返工已經咁忙，連返到屋企都冇得見面，好難維繫感情。」
一邊租樓一邊儲錢，好在兩夫妻收入穩定，結婚4年儲下約150萬元，有一次最接近上車的機會
就是紅磡首置盤都收到信可以揀樓，曾太以為終於願望成真：「最初計劃到揀樓呢日，唔理係咩單位，大又好細又好都會買，但可惜揀樓前一晚已經揀完，有啲失望。」
由揀不到首置盤到決定買私樓，最後2019年以大約540萬元，買入屯門掃管笏OMAOMA一個實用面積413方呎一房連儲物房單位：「成日都聽人講自住唔怕跌，都沒考慮太多，我哋真係有住屋需求。 當買樓之後想儲多啲錢，就一起搬返我屋企住，如果未買到會繼續租樓。 （有人話租樓幫人供樓）我老公都咁講，佢認為要買樓係一個資產來，就日後就算賣返出去都得。」
位於屯門掃管笏的OMAOMA，記者當日到附近視察環境，暫時未有便利店，最後要步行8至10分鐘去到愛琴海岸商場，地點較為偏僻，曾太表示即使有積蓄選擇並不多：「我哋都有睇過大埔白石角同日出康城，但呎價平均都要1.7萬元，掃管笏呢度呎價都係大約1.3萬元。」
