「屯馬 ……開通真的很興奮……」屯馬線通車，車程快唔快用家先知道。不過周邊樓價一定升得最快，睇樓大Jay級在《BossMind》繼續帶大家睇樓。今集去九龍城睇樓，估唔到仲有400萬元放盤，比屯馬開通更興奮！不過將價就貨，究竟是驚還是喜？
第一個單位由中原地產高級客戶經理陳蒨葶(Sammi) 帶路，睇54年樓齡的九龍城寶城大廈一個單位。沿路不少唐樓外觀殘爛散，目測十室九空。大廈正門對出，對正垃圾站和公廁，抬頭看到大廈外貌十分殘舊。
單位位於低層，一出升降機，我已提醒攝影師 ：「小心底褲！」可惜他的頭已掃過一條底橫。現場就像八九十年代的槍戰電影經常取景的現場一樣，住戶將衣服晾曬於走廊，即是代表每次回家，必須經過鄰居的衣物，今次是底褲，唔知下次是否胸圍。記者跟Sammi像消防員進入火場蹲低撥開煙霧的姿勢，成功避開衣物，但這只是小問題。未入單位已見多個殘爛位，鋼筋外露、處處生鏽、牆身裂痕……晨早流流已有種唔想多留的感覺，入到單位會如何？
今次睇的單位，實用面積245方呎，一房間隔，業主原來為單位進行翻新，如果要求不高，基本上即買即住。唯一一個睡房，可擺放4呎乘6呎雙人床連衣櫃。惟企缸用料值得斟著，離遠望企缸，「嘩！我以為全部都係閃電毛，近睇先知係石紋。」浴室乾濕分離，但馬桶跟洗手盆距離極近，可以一邊如廁一邊刷牙。廚房改成開放式，一般裝修最貴就在廚房廁所，這方面可以節省開支。外面處處殘爛散，單位內籠又不太差。
至於叫價，Sammi表示：「之前叫價398萬元，但隨着樓市調整又因為疫情關係 ，業主有減價388萬元，早之更下調至378萬元，一個月前更有買家差啲以370萬元成交 ，只不過買家搵到更好嘅盤，所以先冇正式成交。」同類型中層單位對上一次成交是5月份，成交價是340萬元。始終大廈快將「登六」，Sammi提醒：「 準買家要留意一點，因為呢類型單位大部份都做唔到高成數按揭，所以首期方面大家要預算多啲，甚至係一半首期 。」
大廈殘舊，首期又要畀咁多，買這個單位似乎？Sammi反駁：「少年，你太年輕了!呢度喺九龍城，喺41名校網，好多準買家都係因為校網而選擇呢度！」41校網有很多傳統名校，包括喇沙小學、拔萃小學、瑪利諾修院學校（小學部）。
話就話屯馬開通帶動樓價，實際上，區內除了有低銀碼單位放賣。還有性價比高的舊樓租盤，吸引不少追求校網的孟母青睞。地膽經紀娟姐就提供一個1.3萬元的兩房租盤我直擊。
大廈位於打鼓嶺道，距離宋皇臺站約5分鐘步程。外觀冇殘爛散，見外貌咁企理，以為有升降機，點知一開大閘是一條非常斜的樓梯，「好似登上珠穆朗瑪峰一樣，扯晒蝦！而家係早上，呢度都有啲昏暗，我自己一個女仔好驚囉。」
幸好單位在1樓，唔使行咁多樓梯。單位業主早年以約400萬元買入， 花約20萬元裝修，間隔四正實用，客飯廳分明，兩間房間都有足夠空間擺放雙人床和衣櫃，惟值得留意的是，單位廚房沒有煤氣，租戶要買電磁爐。但單位最大驚喜是，120方呎平台，雖然平台只望舊樓後巷，不過都叫有個戶外空間。
所謂百貨撞百客，這個平台特色戶在截稿前以1.28萬元租出。至於寶城大廈1房單位，業主暫時封盤。
——————
密切留意BossMind動向!立即CLS
▴FB
https://www.facebook.com/bossmindmedia/
▴Instagram
https://www.instagram.com/bossmindmedia/
▴Youtube
https://www.youtube.com/channel/UC4VI_WmdfVMTkT4vKCiZA4A
#BossMind #港股 #美股 #地產 #財經 #樓市 ＃地產
