其實每一層樓背後，都有不同的故事，今日的主角就是Ivy，她有兩個身份，是飲品店老闆以及 Grand Marini業主，為何找上了她？就是因為5年前她一個大膽的想法，10分鐘、零睇樓決定買日出康城領都上車，再於30歲時換Grand Marini一個高層海景三房單位，勵志嗎？Ivy認為更多的是幸運和感恩。
5年前Ivy跟丈夫準備結婚四出睇樓：「因為我哋家人都係住九龍東，我哋預算有限，日出康城就係全個九龍東最平，所以選擇領都，因為供應量好大叫價空間都大一點，我哋就鎖定呢個屋苑。」
那段時間Ivy一見有筍盤就去看，對屋苑已經很熟悉：「我哋一直都追樓價，想等樓價跌，已經觀望半年， 一直等一個靚價就入市，越等越冇，越等越升已經錯過咗。」 當時他們的預算是600萬元樓下，由於當時未有「林鄭Plan」，樓價高於600萬元，就要支付四成首期，看了多個領都放盤，可惜價錢都是高於600萬元，他們打算放棄買樓，轉為租樓，怎料去到地產舖遇上一個難得一遇的急走盤：「經紀跟我哋講有個放盤 ，不過放緊租冇樓睇，我哋睇過單位資料是我哋想要嘅戶型，然後我哋就話如果業主600萬元可以的話，我哋就買！ 經紀立刻打俾業主，原本叫價係640萬元，喺十幾分鐘期間，業主減價40萬元，中間差價可以用嚟單位裝修，又可以成功上會，就決定買啦。」首期全屬二人幾年來儲下的積蓄。
10幾分鐘的瘋狂決定，以600萬元買入一個600方呎三房單位，其實源自於他們做足功課，Ivy跟丈夫已看過領都五十多個單位，有足夠了解，加上有問清楚經紀單位是否涉及凶宅或其他問題，才敢大膽決定，Ivy表示：「我當時諗係咪真係有咁大隻蛤乸隨街跳啊？我哋嘗試還價都係亂咁講，我哋覺得係冇可能的，因為呢類型單位當時叫價全部都係630萬元以上的，好似街市收工前特價時段，好平就買嘅感覺，聽很多朋友講買樓好似買菜咁，當刻唔去搶就冇機會，好多因素可能業主又想套現，所以我哋先買到呢層樓其實個單位是一直放租，應該質素衰極有限，加上都打算用20萬元裝修，係大膽嘅，都係搏一搏 ，好幸運地買入人生第一個單位，如果唔係，應該會一直租樓。」
成功上車後，他們好快又考慮另一件事，就是換樓。因為Ivy當時認為，即將踏入30歲，如果不去換樓，年老後怕無法負擔：「都考慮過二人唔想退休後仲要供樓，30歲如果我哋唔去換樓，供樓至少要30年，我怕我哋會供唔起 。」之後看到會德豐地產推出日出康城的新盤Grand Marini，就希望一試：「見到呢個屋苑，我哋就考慮係咪換樓嘅機會？ 呢個時候唔換，係咪就冇機會？ 所以我哋就決定搬好一啲單位。」最後領都單位以800多萬元售出。
再以約1360萬元買入Grand Marini一個高層海景三房單位，問到認為香港樓市等不等人 ，Ivy坦言：「唔等， 真係唔等，樓市不斷升，身邊有朋友都等樓價跌，但到最後都係要供多啲。」近日樓價回調，她都坦然面對：「我從來都冇去擔心過自己物業的價值，我同先生每一次買樓目標都係自住唔係炒賣，以我哋兩夫妻收入只夠供一層樓，呢一層樓都係幸運可以喺當時換到，如果唔係的話，我呢世都冇可能住到800呎嘅單位，好幸運地買到這層樓，住到呢個單位，香港人嚟講已經係好大嘅福氣 ，無論樓市升定跌我哋都冇能力再放售單位，除非我發達 。」
