疫情持續兩年多，禁晚市、限聚令等防疫措施影響商戶生計，第五波疫情爆發更令各行各業雪上加霜，擁有兩間飲品店老闆Ivy，生意額每天由1萬元急跌至幾百元，坦言是自開店3年多以來最難捱的日子。
本身是幼稚園老師的Ivy，於2018年決定跳出舒適圈，於天后開設主打新鮮水果的果昔飲品店， 店內的文青設計吸引不少年輕人前來「打卡」，所以生意額高峯達1萬多元一天，其後更於中環開設分店，惟2020年尾疫症殺到，改變香港人生態，在街上帶口罩，不會再買飲品邊走邊飲。
第五波爆發 全日幾百蚊生意額
Ivy指幸好中環分店主打寫字樓生意都夠撐住，但隨住第五波疫情爆發，大部份公司陸續在家工作，生意額急跌至幾百元：「中環情況本身係好啲，喺疫情冇咁嚴重下好多寫字樓生意，尤其星期四、五大家有個心態，叫野飲輕鬆吓，但自從呢一波疫情第一日，明顯開始見到生意急速下滑，個個在家工作冇返工，所以冇人嗌野飲 。」
香港經歷幾波疫情，數第五波疫情最重創，Ivy表示：「今次打擊係最大，舖頭三年嚟生意最差嘅時刻，係差到唔可以收支平衡，但係冇辦法我明白因為疫情同社會大趨勢，所以我地都……呢個階段就認命囉。唯有改動策略例如減少人手返少啲、 盡量安排少啲兼職，喺開支到扣減，其他部份都要硬食 。」
堅持唔炒人 力保員工飯碗
有老闆選擇裁員開源節流，記者問到會否考慮這個方案，當時Ivy已經眼濕濕，隨後哽咽地說：「我冇諗過炒人，因為我哋好好感情，成班同事班底沿用咗好長一段時間，好感恩係啲同事明白，我從來冇聽過佢哋話 少咗更返，反而話我哋一定會越來越好，生意一定會上返去，所以好感恩有呢班同事，更加唔會諗唔要佢哋。」
政府推「禁追租」 Ivy：「令我壓力更大！」
政府推出部份政策資助商戶例如禁追租，但對於Ivy而言，根本幫不到手：「其實對我嚟講完全冇幫助，業主唔追租除非我係爛仔一名，我走！永遠都見唔到業主！其實冇可能，佢可以經法律途徑都係搵到我，咁我欠租嘅話3個月之後都係要交租，我拖拖下，我負債咪仲多？之後我未必還得清我3個月嘅租金，我唔會考慮唔交租，呢個係令我壓力更加大。」
Ivy的飲品店是食物製造廠牌照，在過去政府的資助計劃中受惠較少，她指政府一直忽略這一類商戶：「喺政府角度食物製造廠就係外賣，有啲食廠係做外賣飯，以我地天后呢間舖頭為例，作食物牌照係食物製造廠，因為我地淨係做外賣生意，兩波疫情下，基本上係資助方面係比較少，忽略咗有啲食物製造廠好小店、小本經營又或飲品店、雞蛋仔呢一類，因為疫情而影響心情，根本冇心情飲你啲野飲。」
終於等到三月的時候政府宣布，新一輪保就業計劃出糧方面，可以稍為幫輕Ivy：「當然希望疫情快點過唔止係生意，對整個香港都好重要，今次是重創香港，唔止重創我哋舖頭。」
