「史上最大規模的內房救市」，猶如「香港最黑暗的一天」，總係一浪高於一浪。摩根大通發表報告，認為今次救市係冒險之舉，構成內銀信用風險，在小弟看來，呢間外資大行實在大驚小怪，要驚冒險、信用風險，早就一年多前爆發爛尾樓危機時已經要擔心。
所謂大規模救市要拖到年幾之後先推出，時機早就錯過了。反正解決內房問題咁難，於是目前嘅唧牙膏式救市成為最終選項，救唔到市，都要維穩，一於將問題拖字訣。
最近一星期，內房救市訊息的確訊息量爆炸，包括1）市傳訂立可獲融資嘅50家民企內房白名單、2）考慮允許銀行向房企提供無抵押流動貸款。至於正式落實措施，包括3）監管部門提出「三個不低於」，總之貸款予民企內房及相關按揭增幅要大於平均房地產貸款增速，4）深圳取消豪宅線、令購豪宅稅負減少約半成，5）二套房首付由七至八成降至四成，令買二套房門檻大減。
講到呢度，就要提一提舊年推出《金融十六條》其中一項，2024年底前商業銀行支持房企開發貸款、信托貸款等存量融資，形成不良的，相關人員盡職免責。
簡單講，內銀要將貸款更傾斜予民企內房，明年底前貸款最終違約都獲免責，同時以深圳作試點，減低買二套房門檻及減低豪宅稅負。
以傳聞納入白名單之一嘅碧桂園（2007）作為例子，6月底計息流動負債大約1,000億人民幣，加上要支持開發、合約貸款以維持生命嘅話，應急貸款肯定不止1,000億。咁樣輸血法，有用麼？問題係碧桂園近期每月賣樓收入約60-70億人民幣，業績亦錄毛虧損，除非樓市真的大幅回升，由毛虧變明顯毛利，賣嘅量亦要明顯增加，否則延長生命最終只係畀多咗住院醫藥費。摩通所擔心嘅係，民企內房爆煲，內銀要撇賬，如果再發放無抵押貸款，最終內銀要找更大筆數。
內地樓如何回復價量齊升？難度實在不低，原因係過去兩年樓價走弱，但住宅新開工面積依然遠比竣工面積為多，即係樓價下跌、需求偏弱之下，至少未來一年竣工面積、市場供應仍會繼續增加。今年10月份，住宅新開工面積5147萬平方米，仍高過竣工面積4760萬平方米約8%，新樓供應繼續壓抑樓價反彈，加上交樓都有問題、冇人敢買樓花之下，民企內房即使未來一年獲得流動資金續命一年，賣樓套現能夠還債仍然非常困難。
措施有冇用？應唔應該出？答案係有用，應該出，原因係為民企內房續命雖然增加負債，但可以減慢佔GDP約15%嘅房地產相關經濟活動嘅流失速度，對經濟衝擊減慢，就業問題亦冇惡化得咁快，維穩更重要。目前係要用負債買GDP嘅環境，可以預期嘅係，明年今日，中央可能推出更激進嘅內房救市，一年之後先出？如果唔係，點稱得上唧牙膏？
晉佳
https://www.facebook.com/advanceguy1
註：專欄作家言論不代表本網立場
