2023年成為美股大升市嘅一年，繼續係聯儲局一己之力玩轉環球投資市場嘅一年。雖然一年已過，美股升市大局都可能玩到尾聲，相信唔少投資者對於聯儲局過去兩年嘅操作，如何令美國走出滯脹風險，都仲係一頭霧水。
成件事就要回帶去到上世紀60年代後期，當年惡性通脹襲擊環球，其後美國超過十年時間加息、令通脹回落、減息、再令通脹回升，來來回回纏繞咗十幾年，直至伏爾克上任聯儲局主席後，祭出大手加息+縮表，令通脹80年代開始逐步回落，美國經濟先至進入下一個增長期。
無錯！其中一個關鍵，係加息同時要縮表，因為，加息同時維持貨幣供應明顯增加，放水自然抵消加息嘅效力，唔足夠壓倒惡性通脹。當今嘅聯儲局自然十分明白，同樣嘅錯不能犯上兩次，於是今次打擊通脹，就直接加息+縮表，絕不猶豫。
美國聯儲局喺2022年8月Jackson Hole會議，先至一錘定音大幅度收緊貨幣政策、將打擊通脹視為首要任務，態度可謂180度轉變。講緊2022年4月時，鮑威爾先至話美國冇惡性通脹，而事實上，2021年下半年美國通脹已經係肉眼睇數據能夠睇得出嘅趨勢，而當時美國參眾兩院議員鬧到鮑威爾high high，話佢點樣後知後覺。然而，呢吓「遲狠準」嘅貨幣政策轉向，先至係壓通脹同時保持經濟軟著陸嘅唯一出路。
首先，喺低息年代，低息融資氾濫，係又借唔係又借，企業融資期一般兩至三年起跳。聯儲局遲遲未收緊貨幣政策，就等企業有足夠時間洞悉「通脹來了、遲早加息」，於是先進行足夠融資，避免企業大幅受創，拖累經濟。而去到真正快速加息後，新資金面對高息，就已足夠壓抑物價。
講咗「遲」嘅好處同必要性，就要講「狠」，就係要最短時間將利息加得夠高，再進行policy firming，然後就可以盡早減息，令到高息能夠壓倒通脹之餘，高息維持時間縮到最短，亦係班議員所批評「後知後覺」所帶來嘅效果。與此同時，聯儲局要一直「扮鷹」，透過高息預期去壓抑通脹預期，口頭放鷹反而最終唔使加咁多息。
至於軟著陸，就有賴於出乎意料之外強勁嘅環球就業市場，喺高息期間，美國失業率一直維持低企，如果人人有糧出，又或者唔夠使要做多份part time，至少唔會形成消費大幅萎縮、企業盈利受創、裁員、消費再萎縮嘅惡性循環，冇咗呢種惡性循環，美國喺高息期間尚能維持低增長，最後形成壓倒通脹、經濟避免衰退嘅雙贏局面。
至於點解突然變臉話減息？原因係，再唔減息，再融資市場睇怕會頂得順，無論債台高築嘅美國政府本身，又或者企業，都難以啃得落目前嘅高息，要避免市場系統性風險，點都要減咗先算，稍後營造另一個融資高峰期。萬一通脹回升，睇怕會嚟多次加息潮，但幅度唔會有今次咁激烈了，聯儲局是不會怕的。以上嘅操作，恐怕只有聯儲局先操得出來。
不過，2024年恐防唔係聯儲局能夠單手喺投資市場呼風喚雨嘅時期，地緣政治、大國矛盾風險不容少覷，下一步嘅事，留待1月13日台灣大選後再講，未見到結果就講展望都係嘥氣。
晉佳
https://www.facebook.com/advanceguy1
註：專欄作家言論不代表本網立場
