港股恒生指數再一度跌至16,000點附近水平，距離舊年地獄低位14,597只係一成空間。同舊年9至10月情況不同，舊年10月跌市期間，出現3次單日下跌逾500點甚至逾千點嘅大跌市，大家可以賴人踩人、賴不理性、賴恐慌。至於今年11至12月，跌最多嗰日都唔夠400點，呢種跌法就係有序、冷靜咁下跌，即係話，投資市場冷靜地認為抵你恒指跌落16,000點，再賴，就唯有賴落外國勢力吧。
如果單計港股通，過去一年，北水的確增持嘅比較多，其中增持股本超過1%嘅港股達到291隻，減持嘅只有75隻，減持股份大隻嘅有比亞迪、吉利等汽車股，仲有港交所，以及部份民企內房股。唔敢講除咗港股通渠道以外嘅中資係咪淨買，但話北水越跌越撈都冇乜錯。喺北水偏向買嘅情況下，港股都係跌，就知外國勢力沽得有幾狠勁。外資沽港股止蝕轉買美日台股，北水逆向接港股變成賬面虧損要捱價，形成中資外資財富效應此消彼長。
過往港交所每年都會透過《現貨市場交易研究調查》發佈外地投資者嘅交易比重，2020年嘅比重係41%，不過自從2021年起，相關報告已不見公開發佈，而巧合嘅係，港交所不再公開呢份報告嘅2021年至2023年，港股就跌足咁耐，或許外資參與程度變成不能說的秘密。
大摩喺今年9月發表報告講到，海外機構喺港股參與比例，由2020年底約40%（符合港交所調查報告數字）降至今年8月嘅25%，至於同期港股通參與度升至接近三成。以數字睇，截至8月，中資同外資比例去到六四比，中資參與比例只會越嚟越大，外資越嚟越少。
假如跌到谷底，又識唔識得升？以港股往績計，跌市長度最持久嘅一役，就係科技股泡沫爆破後嘅2000年4月至2003年5月，跌市長度同目前相若。當年投資者擔心香港經濟進入結構性衰退，不過其後有CEPA、有開放自由行，加上中資股喺香港上市，食正入世後出口、內需急升嘅浪潮，當時透過祖國嘅強大需求改變咗香港經濟。不過，今時今日香港背靠祖國之際，假如祖國出現結構性經濟問題嘅話，莫非要背靠宇宙去解決問題？
即使外資去到某一日沽乾沽淨、持股低至一個極端水平，港股仲能否重拾光芒？至少，2003年嘅劇本已經不可能複製多一次了。
晉佳
https://www.facebook.com/advanceguy1
註：專欄作家言論不代表本網立場
