見大家見到TVB份業績cap 圖已經群情洶湧，夜晚終於認真幫佢拆數去睇，連我自己都震驚！
1：TVB（511）公佈至去年12月底止全年業績，期內虧損擴大，全年蝕6.57億元，上年同期蝕2.57億元。
2：咁代表咗TVB連續4年都蝕錢！4年夾埋輸14.3億元。即是話，2017、16年賺嘅錢，都已經輸返晒，2015年嘅盈利，都輸走一半。
3：全年收入29億元，比上年多6％。好似多左收入係咪？不過有8％係來自士多嘅2.4億元sales貢獻，減返商貿收入，以持續經營業務概念去睇，收入係按年跌1.3%。
4：吓？電子商貿收入貢獻咁大？咁上年得3000萬唔夠，今年多咗2.4億就多一大舊數。不過要睇電商業務，都係睇返GMV會開心啲，TVB只係公佈今年2月份GMV，一個月有9400萬，創新高，威威！比起未被收購前嘅士多，一年全年GMV只係4億，所以真係大躍進唷！不過，我又俾多粒數大家參考吓，HKTV mall（1137）今年2月GMV係8.5億元。講埋呢part 業務賺定蝕，to be fair，新收購冇耐，仲係燒錢階段係合理嘅，EBITDA 係9288萬，負數呀，唔係正數。
5：咁睇埋廣告，TVB廣告收入多咗1.4億或16％，去到10.24億元。平時唔小心click 去TVB，明明都只係見到自家廣告，真正唔聲唔聲，竟然廣告收入有增長。不過，下年最少會少2000萬廣告收入，因為蟲草大王嬲咗TVB唔俾佢同Ali影相。
6：作為業績分析，將條數同同業比較，都是好合理，藍viu一年廣告收益，按年升一倍，去到6.2億元。粗略計，TVB同藍Viu廣告市場market share，已經「六四比」！不過有趣個位係，TVB話，上年黃金時段的收視率共錄得 24 點，佔觀眾份額的 77%。睇返啲收視報告，Viu套《IT狗》明明已經勁受歡迎，但結局周收視都係得4.6點。咁樣代表了，今時今日，marketer 落廣告都已經唔再純睇收視。TVB收視再高，要轉化成為廣告收入難上加難。
7：對於黃金時段的收視率有廿幾點，TVB專登寫咗句去解釋，原因係「製作了一系列豐富的劇集、綜藝及新聞節目，吸引廣泛的觀眾收看。」嗯……noted with thanks.
8：咁成本又點呢？總營運成本增加4.5億或者14％，去到37億元；集團話「主要是由於持續投資於內容製作、人才培育及資源投放，並自2021年8月底開始將士多集團的營運成本綜合入帳所致。」睇細數，來自士多嘅成本有1.4億元，至於咩咩放去改革創意人才團隊嘅銀碼，就多咗1億元。咁我就睇睇，TVB員工人數有冇異動，集團有 3,870 名全職員工，其實真係比上年請多咗226人。
9：再睇落去，有條數我嚇親，至year end，現金及銀行存款有12億，但上年year end有33億，成20億去咗邊！！！原來，TVB 2020年同銀行借咗2.5億美金，正正係20億港紙。原本條數係出年2023年7月到期，但因為上年期內，債務比率高過條款講明嘅水平，加上EBITDA唔到數，所以，TVB本來應該俾銀行CALL LOAN！！！！！！！！！！！！不過，經講數後，集團只須提早一年，即係第二年還清。咁大件事，要人講！！！！！！！！！
10：人又請多咗，錢又使多咗，債又提早找數。依家話改革，改革咗啲咩？創意咗喺邊？……聽講153會出山做主持！其實能夠諗到搵返代表上一世代嘅藝人，去吸引返一批年輕觀眾，單係有呢個諗法，我都覺得好有創意。
by千頌C
FB專頁
