1：林鄭宣讀最新一份施政報告，洋洋灑灑3.4萬字，字數來講，有耐都未破佢過往紀錄（2018年佢第二份施政報告，有6.1萬字），不過呢份施政報告，對香港往後發展，意義極為深遠。
2：有幾遠，距離就係中環去到深圳咁遠。由港英時代到今日，香港經濟核心，即係國際金融中心，一向位處港島中區，不過香港未來發展方向，已經不在港島，而係尚待開發嘅新界北部，即係所謂「北部都會區」。
3：甚麼才是重中之重，或者由提及次數已反映一切：
「中環」：只係提咗1次，仲要呢唯一一次，只係講保育；
「港島」：有4次；
「九龍東」：講咗好幾年要起動嘅九龍東，就只有1次；
「都會區」：作為今次焦點，有28次就好合理嘅；
「大灣區」：嗱！「大灣區」就有成31次！
搞笑嘅係，香港人交稅進貢緊嘅「明日大嶼」，只被提及3次。
4：一開頭都諗，點解叫「北部都會區」，唔係「新界都會區」，林鄭喺記者會上，都好難得坦白地解釋，而呢一點係值得留意，聽住啦喎：
「北部都會區唔需要用法律去定界線，如果做得好，係可以幅射到南邊，幅射到北邊深圳都係可以……今次係第一次，特別行政區編劃方案係突破思維，跨越香港同深圳行政界線，睇埋深圳河以北發展，再配合發展都會區。」
意思係，「都會區」唔只涵蓋香港，更有機會擴展跳過深圳河以北！可以預見嘅係，今日新界北部，將來會逐步融入深圳一齊開開心心發展，今日嘅新界北區居民，將可率先快快樂樂擁抱大灣區，成其中一個大贏家！YEAH！
5：贏家又點止新界北，由Google map拉落少少去到白石角，8個屋苑加埋8,200個住宅單位，容納逾2.4萬居住人口，全部業主都成為贏家。
白石角可以話係大埔嘅一條盲腸，明明大埔好多車，但呢2.4萬人，每日只係望住啲車經過，要出街，一係靠小巴出，又或者幾架極疏巴士出市區，去觀塘，一個鐘先一班；去中環？仲厲害，每日有5班。將來有鐵路嘅白石角，相信可以由一條盲腸，堂堂正正地變成一條大腸。
6：變做大腸後，白石角業主Fat fat，如果你剛剛成為白石角新業主就仲fat fat。據早前各大傳媒報道，前公務員事務局局長羅智光，今年6月以首置名義入市白石角朗濤3座低層C室，成交價1886.1萬元，呎價約17,100元；另外，有「最強見習騎師」之稱嘅「00後」騎師周俊樂，今年7月都用近1300萬元買入白石角嘉熙中層三房。
7：留意返，林鄭今日講個白石角站，會起喺教大運動中心，即係優景里隔離。咁代表咩，代表新地成最大贏家！因為新地正正喺優景里起緊個住宅項目，成個項目總樓面面積約949,402平方呎，共建14座住宅大廈，分別樓高11至14層。
本來優景里係屬於山旮旯之地，四野無煙，人影都唔見隻，但想當年新地2019年，就以超過63億元，以接近市場預期上限中標，成為當時白石角第三高地價；到今日呢個盤，就無啦啦成為鐵路盤！
8：最後，終極大贏家當然係香港人，香港好，都會區好！都會區好，大灣區好！大灣區好，就大家都好！YEAH！（跳起）
by千頌C
FB專頁
IG Follow 埋唔該
——————
