1：早幾日睇過富途第三季業績，經調整淨利潤按年增59%至6.46億元；總營收按年增83%至17.31億元。不過今次唔係想講呢條數，係想講另一粒數－－香港用戶。
2：根據公佈，香港用戶數目，大大話話有222萬人次，全香港人口先至係748萬，相當每三個香港人，就有一個用牛牛。
3：可惜我搵唔到最近香港最近股民數目，Google過最近嘅統計，已經係2014年，太耐啦，條數未有太大比較意義，但for 大家ref，當年係225萬。即係話依家富途條數，相當於當年嘅全港股民數目。
4：詳細breakdown就冇講，但牛牛就話，喺後生仔，即是20-29歲年齡層客戶滲透率超過2成，即每5個有證券戶口嘅後生仔，就有1個用牛牛做trade。
5：人數多，升幅亦都誇，講緊係單係香港客戶用戶數，係已經連續6季，錄double增長。連續6季都double上客，係勁嘅。
6：如果認真要分析，點解牛牛咁多人用，仲有咁多後生仔用？咁老實說，佢個app係真係好用嘅，真係所有功能都齊；對比起傳統港資行，連個所謂app都只係一個手機版網頁，大佬，真係搞唔掂。
7：咁時也命也，之前政府出幾轉iBond，牛牛勁燒錢去吸上客；到後來大家開始想炒美股，當時市面上最力推美股嘅就係牛牛，而佢嘅用戶力量大到，有段美股炒得好癲嘅時候，大家都叫盤前交易時段做「牛牛時段」。
7：牛牛識玩個位係，就係佢個牛牛圈呀，記得之前炒meme股，就算股價暴跌，牛牛圈嘅人都係信念不滅，乜春都SH，真係好痴線。呢種痴線嘅氣氛，圍爐炒股，係為大家帶來更多樂趣嘅。
8：呢個牛牛圈有幾勁呢，又睇多次業績，每個香港用戶，喺牛牛App日均停留時長達33分鐘，成半粒鐘對住股票叫「升！升！升」咩？睇多條數就明，Q3每個交易日，有平均有35萬香港用戶活躍於牛牛圈，產生超過10萬則用戶生成內容 （user generated content），以活躍用戶及UGC內容量計，牛牛已成為香港第二大活躍論壇。
9：最後，不認不認還需認，隻牛真係cute cute嘅，我屋企都擺咗兩隻細嘅。
by千頌C
FB專頁
—————————————
密切留意BossMind動向！立即CLS
