1：國泰（293）放榜啦！至去年12月底上全年業績，蝕就蝕少咗，全年蝕55.27億元，上年同期蝕216.48億元。全年收入都係咁上下，2020係469億，2021年係456億。
2：單講客運，國泰收益減就一定，全年跌61.6%至43.46億元；不過，貨運保全家！國泰貨運收益全年323.77億元，按年升31.8%。
3：下半年貨運好強，2021年10月運載超過13.6萬噸貨物，係自疫情爆發以來單月運載的最高貨運量。不過，今日業績會，國泰CEO話，喺現行防疫政策下，貨運運力最多只能維持疫前約三成水平。
4：就咁睇數，國泰下半年竟然有得轉虧為盈，賺到20億，上年下半年係蝕117.83億。
5：大家最關注嘅「國泰油價賭局」－－燃油對沖，延續上半年贏錢，全年賺23.36億，即是話，單係下半年，就勁賺17.11億。上半年業績時，我就計過數，國泰自2014年起燃油對沖一路勁蝕，到2020年全年，7年輸足287.87億元。終於，油價升返，國泰連續7年炒燶油紀錄，終於2021年斷纜。
6：今年第一季平均行使價未到50美元，而目前布蘭特期油價124美金左右。至於到今年底，預期平均行使價，只係40美元。可以話，國泰係俄烏戰爭中其中一個受惠股。
7：國泰今次特登喺業績講，「集團並不是對油價進行投機炒賣，但利用對沖管理油價短期至中期變動的風險，從而控制燃油成本。對沖本身並非毫無風險。」知啦知啦，就好似啲賭仔賺錢時就話自己係投資，賭輸錢時就會話自己唔係先知。
8：由於香港防疫政策太癲，國泰機組人員過去半年已瘋狂流失，仲開始不斷請人。睇返國泰業績，佢公佈咗幾條「疫情數據」：
－自疫情爆發至今，國泰已運送超過1.9億劑疫苗。
－2021年，機組人員入住檢疫酒店超過6.2萬晚
－超過1000位員工，曾入住竹篙灣檢疫設施共超過1.1萬晚
－機組人員喺2021年，共接受超過23萬次檢測，其中16宗陽性個案。
by千頌C
