1：呢兩日收到風，盈富基金要換manager，由原來道富環球，變做恒生資產管理。即是話，旗手由美資，變成英資滙豐（005）同系恒生銀行（011）旗下公司。
2：係好定唔好？咁就要先講吓盈富基金由來。想當年，1998年金融危機，港府為咗救市瘋狂掃藍籌，咁事過景遷，都要諗辦法沽返出去架，但冇理由就咁「噢！散水了，就咁掟貨出街啦！」於是1999年11月，就成立盈富基金，以ETF形式上市，等政府可以有序，又唔太影響市場地退市。
3：於是，追蹤恒指嘅盈富基金，就成為香港第一隻ETF，用IPO形式上市，基金管理人就係道富環球。冇錯，道富一用就用左廿幾年。
4：今次換走道富，唔係冇導火線嘅。話說上年年頭，當年美國總統侵侵，出手制裁個別中資股，當中包括三大電訊股母公司。我係道富就心諗，「咁就大獲啦，我就好似係美國公司，但呢幾隻又係藍籌股，咁點算好呢？」結果，道富決定：不再投資受美國制裁股份！不過…
5：不過， 俗語有話，「士別三日，刮目相看」，道富三日之後，就突然話「 我哋internal傾好咗啦，我哋係亞洲公司，唔係美國公司，所以，冇事！受制裁股份，照買！」
6：噢！原來佢連自己係邊個地區嘅公司都未傾掂，就咁倉猝落個咁大嘅決定。道富嘅身份認同危機，就令盈富覺得有危機，於是開始認真招標換舵手。講真，作為一間管理過千億資產嘅經理，彈出彈入，執行力好似唔太對辦。
7：最終有消息盈富今次揀咗恒生，當然，大家會諗，咁恒指都係恒生旗下恒指公司負責啦，由恒生做返好似都make sense。咁問題嚟啦，恒指公司上個月先將科指成份股權重計錯數，累投資者追貨結果坐艇。負責指數責任重大，呢種低級錯誤都犯得？
8：至於恒生資管呢，其實都出過事，2018年先俾證監會罰款300萬。原因係俾人周到，恒生資管2010至2016年，7年間將基金大量cash，放咗喺阿媽滙豐度。咁正常你放cash入去，suppose都有息收返架嘛，但咁多年呢批錢收嘅息，係0蚊！經調查後，涉及利息有87.5萬，當時證監會認為，恒生資管內部監控不充足，而且冇盡力避免利益衝突。
9：近年國際關係複雜多變，盈富管理人要有足夠經驗、以及應變能力，去應付唔同前所未有嘅事件。當初換走道富，其實就係質疑佢執行力。今次換做恒生資管負責，有冇能力應付咁多變數，真係要拭目以待。
by千頌C
