政府今日發表《長遠房屋策略2021年周年進度報告》，未來十年總房屋供應目標43萬伙，公私營房屋供應維持7比3，並表示已覓得興建33萬個公營房屋單位的土地。對於供應增加會否推冧樓價，「樓市大好友」祥益地產總裁汪敦敬直言：「你就想！想得臭美！」
汪敦敬表示，理論上在投資者角度來說是好消息，因為報告提及私樓未來十年供應只是12萬伙，即是一年供應才1.2萬伙，是少於現時樓花銷售量，私樓價格應該更硬淨。公屋轉換居屋每年約9,000伙，都不要去說潛在土地供應和潛在需求，單是應付居屋需要都不足夠，這個政策應該唔收貨，政府諗法唔啱，佢哋諗法是興建少啲私樓，興建多啲公屋，其實是解決不到供不應求，應該要增加土地供應先得。
對於今日《長遠房屋策略》提到，政府已覓得興建33萬個公營房屋單位的350公頃土地，可以滿足未來十年公營房屋單位的需求。汪敦敬認為：「咁滿足唔到市場，理論上買樓等於施政嘅淡倉，好似政府發展北部都會區就可以滿足到你，我唔同意呢個睇法。公屋輪候人數排隊條人龍係人肉龍，唔係虛擬唔係水份嚟，活生生㗎，其實點會夠？你唔好以為足夠！」
被問及潛在供應43萬伙會否推冧樓價，他直言：「你就想！想得臭美！我哋香港政府一年做到供應量（房屋）嘅能耐，只係萬幾個私樓單位，同埋兩萬幾個公屋，聽得多又唔提高個效率，會點呢？而家香港最令人擔心嘅房屋問題係政府嘅效率，如果樓價跌又有咩問題，如果需求多樓價跌都唔使擔心，唔好睇供應係洪水猛獸，係擔心佢（政府）起得唔夠快！而家唔係高息時代，唔係高負債時期，樓價調整唔死得人，千祈唔好覺得係洪水猛獸。供應都係好事嚟嘅 ，如果供應多咗，人人有樓點會唔係好事，樓價調整得幾多。呢堆數字反而係代表樓價會繼續上升！」
他強調：「目前這個長遠供應是不足，用數字去睇真相，第一居屋抽籤人數冇水份，更加重要是住劏房人數，這些很大機會冇資格申請公屋又冇資格買私樓的人，但政府放寬居屋申請，放咗好多有錢人申請，家庭收入6.6萬元其實可以買天水圍嘉湖山莊，過到壓力測試，呢類人應該係林鄭plan嗰度幫佢，唔應該double benefit。居屋受眾係好重要，因為呢類人正正係私樓買唔到，公屋冇資格去申請，呢類人咪就係住劏房嘅人。全香港有20萬人住劏房，呢個數唔夠cover居屋抽籤人數。」
對於明年樓市走勢，他認為：「2022年樓市會連續破頂，我唔係話升得急，唔想講啲好刺激市民嘅嘢，你都知我啲言論好受人關注。」
－－－－－－－－－－－－－－－
密切留意BossMind動向！立即CLS
