房屋問題一直係香港痛點，最新公屋平均輪候時間上升到5.8年，唔少基層市民被迫居住環境麻麻嘅劏房，搞到我哋國家領導人都開聲話要盡快告別劏房。其實坊間唔少學者提出唔少建設性。好似曹參國早前就去咗香港經濟學會搞咗個研討會，討論房屋政策，真係袋唔少落袋。
今次主講嘉賓都幾強勁，除咗房屋局副局長戴尚誠，仲有嚟自香港大學、城市大學同嶺南大學嘅經濟學者嚟交流。戴副局長發言時，當然講下政府現時工作，話特區政府成立了「解決劏房問題」工作組，為「劏房」居住環境設定最低標準，針對不合最低標準嘅「劏房」提出取締方法等，仲話政府短期內起咗2.1萬個過渡房屋單位，同3萬個簡約公屋單位，希望可以幫啲劏房居民早啲改善居住環境。
不過，在場經濟學者都覺得現行政策係唔係可以有持綪性。香港大學王柏林就話，多年嚟公屋租戶中，符合公屋申請要求嘅住戶一直保持在50多萬左右，但總體租戶數字自2006年至2021年卻增加了十多萬，意味富戶嘅比重不停增加，王柏林就建議，如果公屋租金可定於住戶收入一成即會隨收入上升而上升，會有更多富戶放棄公屋，劏房戶上樓可加快。
城市大學梁嘉銳就提到，香港出現非常普遍嘅躺平現象，好多年青人唔上進就係為咗合資格或保樓資格藉以申請公屋。佢仲懷疑，香港勞動參與率已連年下跌，目前竟已跌低至57.1%，或者同躺平以符合申請公屋有關。
嶺南大學何濼生就直接點出，香港房屋政策鼓勵了躺平攞著數嘅文化，削弱香港經濟活力。佢仲話，昔日麥理浩主政嘅1973-82年間強調自力更生，對福利改革毫不積極，結果係韌力非凡嘅黃金十年。當年即使面對石油危機、面對股市跌去九成以上的1975，居然十年來從未出現負增長，而每逢不景氣後反彈又十分強勁。何教授又指出，賤賣公屋打擊樓市造成1998年負5.9%衰退，大大超過新加坡的負2.2%衰退。且租置計劃推出後，私樓自置居所住戶數目接連出現下跌。2010年推出辣招後，私樓自置居所住戶數目下跌情況再出現。二手樓供應減少下細單位供應減少，呎價暴升，租金又暴升。
何濼生建議，要恢復向上流嘅誘因，公屋居屋宜選址於地價較廉嘅地點。靚地留畀私人市場。港式組屋仿傚新加坡，放棄入息和資產審查，而平均價定於有經濟活動家庭年入息八倍(「八倍價」)；面積則約400平方呎，只供自住。買賣毋須補地價，而業主唔可以擁有其他物業。由於全民均可有以「八倍價」買組屋資格，港式組屋無炒賣空間。富戶唔會買，買了也會換樓。政府以「八倍價」出售租屋還可帶來可觀收益，靚地又可賣好價，香港經濟活力又增，財赤問題仲可以解決添。唔知在場嘅戴副局長會唔會諗諗佢呢?
曹參國
註：專欄作家言論不代表本網立場
