香港過去嘅成功一直都係靠「小政府，大市場」，好多人都以為呢個原則淨係講緊金融市場，但係好多民生生活嘅政策上邊，香港嘅DNA都係要政府唔好「阿媽教仔」。近呢幾年環保署「虎媽」上身，搞埋呢樣嗰樣懲罰性政策，唔單止擾民，係咪做到所謂嘅環保效果都好有疑問？
好似香港4月22日起，將會實施第一階段禁用即棄塑膠用具，即係俗稱嘅「禁膠令」，飲管、刀叉、棉花棒、膠牙籤等等從此絕跡。遠嘅唔好講，係亞洲，南韓就將「禁膠令」實行一年多後突然撤銷，當地政府就坦白講聽到商戶聲音，經濟不景氣加上強推政策會令營商成本大增，承認應從教育改變大眾習慣，而非以罰款懲罰市民。
香港環保署啲官員以前慣咗係啲地盤量吓儀器，出下告票，跟住就返冷氣房，呢個團隊諗出嚟嘅政策當然就「離地」萬丈。港版「禁膠令」仲包括話香港嘅酒店唔再能夠提供塑膠製造嘅潔具同日用品，呢頭先至話要Hello Hong Kong向全世界旅客招手，入住總統套房都唔俾牙刷真係唔知係乜嘢嘅好客之道。其實個遊客冇得用，落去便利店買支大大枝嘅牙膏同牙刷，用兩日就掉咗去咪仲唔環保？
環保署而家搞緊「禁膠令」、「垃圾稅」嘅前提都係話香港早幾年，搞膠袋稅好成功。但其實呢班環保官僚有冇真係可以去睇吓，超級市場嘅膠袋變大變硬，落嘅塑膠料每個都多咗，有啲名貴啲嘅店就派紙袋 ，咪一樣係加咗塑膠先至夠硬淨，仲要唔計用幾次就會掉嘅所謂「環保袋」咪又係用膠做，計計埋埋呢啲都其實好難量化膠袋稅係咪真係成功。
好在金融政策唔係呢班環保官僚話事，如果唔係金融市場都係要阿媽教仔，香港金融中心唔係變遺址都要入急症室。過年團年飯我哋班老友去咗浙江興業大廈嘅浙江匯，為咗環保唔一定每次都要食深海魚，浙江菜式嘅煙燻䱽魚又大條又夠嫩口，仲有陣陣香氣飄出嚟，大條到食唔晒就打包，第日打包冇得用膠盒，真係唔知點算，掉咗佢咪仲浪費。
曹參國
註：專欄作家言論不代表本網立場
