做企業嘅CEO最驚就係要同董事會交代有營運赤字，實會俾董事問番赤字會幾耐？CEO梗係話短時間嘅問題，但係如果班董事睇見唔對路，好多時就索性執咗佢。經營企業仲可以有倒閉清盤嘅出路，經營一個政府就要考慮更加多嘢，唔可以俾政府有赤字嘅出現。
所以喺回歸嘅時候訂立基本法，就係有一條條文講明政府公共財政需要量入為出、收支平衡、避免赤字。先唔好講因為疫情而使大咗嘅防疫開支，喺收入方面究竟政府能否達到目標，睇賣地同補地價嘅數字就好清楚。
最近有媒體標題為「政府加快推地，上半年度料達標五成」，但係睇清楚內文原來講嘅「目標」係指落成單位數目，而唔係賣地收入。睇返特區政府2023/24年度財政預算案，預計地價收入係850億。但係根據土地註冊處嘅資料，呢個財政年度第一季只係得3幅土地進行咗補地價，加埋都只係1億，咁樣同目標真係跑馬拉松都未跑到嘅距離。
咁賣地嘅情況係點呢？呢季最後推出嘅地皮招標係喺荃灣油柑頭嘅「首置」地，有測量師預計收入只有26.2億至36.6億元之間。咁樣餘下三季又點樣追到850億嘅全年目標呢？
而家唯一嘅方法就係將貨就價，未來幾季嘅補地價同賣地，政府要考慮現時嘅經濟情況，貨幣市場變晒樣，利息又高企，發展商要有合理利潤。補地價同賣地嘅價錢可能要較「貼地」，未來可能見到啲較「接受現實」嘅數字。
香港財赤嚴重，呢850億賣地收入十分重要，政府要努力諗諗「追數」策略。講開將貨就價，我嘈老闆食嘢都唔係淨係識食靚餐廳酒店，好多時都走去橫街窄巷搵又平又靚嘅隱世美食。上星期就去咗尖沙咀重慶大廈一樓嘅巴基斯坦餐廳，同老闆Jacky傾偈，遊客雖然多咗，但係同疫情之前真係冇得比，所以佢哋嘅招牌咖喱同薄餅雖然味道好特別，但都唔敢加價，仲諗住遲啲可能要有優惠劈價先至增加番啲人流，呢啲咪就係市場智慧。
曹參國
註：專欄作家言論不代表本網立場
