香港而家嘅生意往來開始逐步回復正常，上個禮拜有大洋行就請咗我曹老闆去尖沙咀Hotel ICON頂樓嘅中菜廳，嘆中菜同飲日本清酒。睇住個270度嘅維多利亞海景，真係唔覺唔覺又飲多幾杯日本清酒，尤其酒行老闆推薦嘅「剛烈」，配前菜「乾邑焗生蠔」真係一絕。
喺Hotel ICON 20樓嘅呢間「天外天」真係冇改錯名，海天一色配一流中菜，最精華嘅香蔥爆原條關東遼參，入口即溶，仲有陣陣香蔥回甘，配埋支夾海鮮飲嘅「開運」日本清酒，唔覺唔覺又飲多杯，真係追住嚟飲好高興。
追住嚟飲日本清酒，其實都好似追住加息咁樣，一開始咗就唔係咁容易停。而家美國聯儲局12月都幾肯定會繼續加息，計計埋埋上年已經加咗唔少，有啲人就話好快就會停或者會掉頭減息。有呢個想法嘅人應該冇飲過日本清酒，加息係一個周期，唔加到咁上下係唔會有預期嘅效果。而且加息原因一直係話想要壓抑通脹，通脹又受俄烏戰爭影響，邊有咁易搞得掂，所以加到5厘都唔會咁易停㗎。
有咁上下年紀嘅記得上世紀80年代美國加息周期， 一加就加幾年，加到十幾廿個百分點，美元強到其他國家頂唔順先至搞咗個《廣場協議》，呢個加息周期先至停落嚟。今時今日美國仍然係金融領域嘅霸主，歐洲而家又四分五裂，中國又唔想喺世界舞台咁高調，睇嚟要聯合起嚟對抗美元嘅機會係好少。
加息當然有人歡喜有人愁，供緊樓嘅就要食少幾餐好嘢，但係嗰晚大洋行老闆話俾我聽其實強美元底下，聯繫滙率令到港元好有購買力，無論平平哋買家庭電器，定係買新車，將會係越嚟越抵買，追飲酒追到暈咗就唔係咁好，追住加息就要識得自己搵位走，隨時搵到賺大錢機會。好似呢次晚餐嘅甜品荔芋燉蛋白，好有驚喜，靚芋頭蓉個口感夾得到蛋白嘅香味，敢創新，敢嘗試， 呢啲香港精神係點加息都打唔死嘅。
