香港終於脫離幾年嘅封閉，無論係接通世界，定係同內地接軌，可以話冇晒屏障。但係冇咗抗疫嘅阻礙， 想可以好似疫情前咁多遊客嚟香港？呢個時候真係挑戰緊香港，無論係政府定係民間機構嘅智慧。
海洋公園有幾多人入場，就真係反映緊香港嘅旅遊業係咪可以復甦，喺疫情期間，佢哋都已經好努力咁開放咗最新嘅水上樂園，又有頂級嘅新酒店，連出海學習呢條橋都用埋，真係有山食山，近海食海。
上個禮拜海洋公園主席就喺龍王餐廳同曹老闆講佢哋嘅大計，對住無邊無際嘅水族館魚缸食嘢就真係好過癮，原來佢哋仲有間私房，幾個人傾吓計可以有好特別嘅體驗，全香港應該冇另一間餐廳有咁嘅環境。睇開我呢個專欄嘅朋友就知道我係好飲好食，呢間餐廳最唔好嘅就係冇海鮮食，不過牛柳粒都算夠火候，仲有新鮮桔仔配合嘅朱古力甜品，一齊放入口有特別口感，唔係小朋友都食到舔舔脷。
飲飽食醉當然就要聽吓佢哋有咩發展大計，雖然舊年山下園區嘅投標失敗咗，但係好快就會再接再厲，引入唔同嘅合作夥伴喺山下園區推動零售餐飲。而有先天優勢嘅山上園區就會加入歷險項目嘅夥伴，而家有啲國際級嘅遊樂設施機構已經有興趣嚟緊落標，到時睇吓有乜嘢勁過笨豬跳同玻璃橋嘅新招 。
原來剛剛過去嘅新年，佢哋仲引入咗Baby Shark喺威威劇場表演，成個水族館都貼咗Baby Shark嘅教育資訊，而小朋友迷戀Baby Shark絕對唔會弱過港媽追Mirror ，呢個合作會係一年，所以大家可以慢慢去欣賞。如果對比番香港政府個Hello Hong Kong，特首個大樣喺宣傳片由頭出到尾，有時真係唔知佢想畀邊個外國遊客睇，都係去海洋公園同Baby Shark打個卡實際啲。
曹參國
註：專欄作家言論不代表本網立場
