呢排睇返報紙啲報道，先知道原來香港學童自殺嘅數字真係嚇死人。淨係今年已經超過269宗學童自殺個案，當中更加有37個學童因此自殺身亡，有5宗仲喺學校裏面發生，最細嘅年紀只係九歲學童，你話呢啲數字係咪真係驚嚇過恒指跌到五千點呢？
其實喺中環打滾嘅投資者，經歷過唔同嘅風浪，無論係股票市場大冧市，定係喺環球經濟大衰退，可以一夜富貴又可以一鋪清袋，人生大上大落，只不過好似香港一年要打幾次風，間中遇到世紀疫症同五百年一遇嘅大雨一樣，外來嘅衝擊都係人生必然要經歷嘅事，希望年青人可以多啲了解世界艱難嘅道理，早啲知道自己點樣定位，搵到人生努力奮鬥嘅方向，其實社會都有好多有心人，推廣精神健康，鼓勵年青人增加抗壓能力。
好似曹老闆上幾個禮拜就被邀請去參加喺警官俱樂部舉行嘅香港情緒健康學會就職典禮。嗰晚真係冠蓋雲集，主禮嘉賓有好耐冇見嘅黃仁龍，仲有陳肇始、葉兆輝、譚惠珠、何啟明等等前任同現任高官名人支持，一齊撐關注精神健康。發起呢個會嘅林美玲醫生同黃廣興博士都係呢方面嘅專家，黃sir更加係退休之前係警隊入邊做談判專家組嘅主管，前線經驗同理論相結合。
佢哋成立以來已經搞左好多支援服務，仲喺大氣電波度開咪宣傳正能量。當啲有心人去關注學童精神健康都可以幫到手，就好似股票市場雖然一潭死水都唔係冇計仔。雖然美國嘅退休基金已經宣佈唔再投資喺香港嘅股票市場，至於點解要咁做，當然就唔係純粹投資策略嘅考慮啦。
咁我哋香港人又點樣自處呢？而家強積金越滾越大，啱啱先話要將強積金投資喺香港未來發展嘅債券，其實不如將啲資金投資返喺香港股票市場，增加比例，好似新加坡嘅退休基金策略先可以撐返自己嘅本土金融體系。
至於去到年尾，唔少外資行又評估嚟緊下年恒指嘅走勢，講到明年中都係18,000點左右，但係上落可能又有3,000至4,000點，呢啲評估真係冇咩參考價值。不過就算佢哋真係話俾我哋聽恒指跌到5,000點都唔係世界末日，希望總會在明天，至少香港一定仲有好嘢食。係當晚就職典禮嘅俱樂部都唔錯，最記得嘅水晶雞夠晒嫩滑，仲有安格斯牛肉粒同埋新鮮炸嘅蒜頭，食到停唔到口。其實人生嘅快樂可以好簡單，一餐滿足嘅飯都可以撐住我哋，迎接我哋每一個清晨。
曹參國
註：專欄作家言論不代表本網立場
