中環好多大銀行都喺自己頂樓搞Penthouse私房菜，我曹老闆去過獅子銀行，風景就當然一流， 新中銀大樓70樓就更加古色古香，食緊飯都去欣賞下古董。上個禮拜去恒生銀行24樓博愛堂，千祈唔好以為佢係中醫診所，只係用咗孫中山先生「博愛」精神嚟命名。
中環有咁多會所，講到食物質素當然有番咁上下，但係銀行私房菜就主要招呼大客戶，出品當然唔會差得去邊。博愛堂掌廚的行政總廚陳師傅，曾獲法國美食協會頒發專業廚師勳章（Chaine des Rotisseurs）同兩度奪得旅遊發展局「美食之最大賞」至高榮譽金獎。
淨係聽個名堂都知道唔會差得去邊，咁嗰日食晏出品都唔差，好似最簡單嘅雞就能夠帶出鮮味，燕窩甜品更加係畫龍點睛，而且服務都係一流，有機會真係要試吓佢哋自己出品嘅雞骨草，真係唔係度度有得飲。
食飽飽當然要講吓個市，尤其係有大行講話恒生指數會跌到去15800點，同台賓架就話港股上上落落唔出奇，係咪去到咁低就唔知啦，不過減下磅增持現金都係中環好多人做緊。香港人要識食，都要識得避險，真係從來都未聽過咁多人叫人增持現金。
