有「不夜城」之稱嘅香港，過往愈夜愈熱鬧，但經歷疫情洗禮後，港人變得少出夜街，喺復常通關後，北上消費成風。尋日喺中環華商銀行會同返銀行有吹水，食住佢哋出名嘅有皮鴨掌、蝦球同靚湯，一人一句講起夜經濟都真係講到好繽紛。
而家香港飲食、零售市道差勁，政府唯有出大招，搞咗個名為香港夜繽紛，英文名叫Night Vibes Hong Kong嘅大型活動。各大商場、戲院亦陸續推出優惠響應夜經濟。連夜晚搭港鐵都有優惠，看到政府已出盡五牛二虎之力，希望吸引多啲人留喺香港消費。不論成果如何，做點事好過咩都唔做啦。
不過，我曹老闆有點唔明白，夜繽紛嘅LOGO竟然出現一大堆嘅霓虹光管。無錯霓虹招牌係過去夜香港一大特色，唔少海外旅客視之為一個難得打卡點。但政府在過去多年用咩建築安全為由，全港有特色霓虹招牌已拆得七七八八。之前先有部電影燈火闌珊，就係講霓虹招牌消失同保育嘅故事。其實呢幾十年都無咩聽過霓虹招牌塌下嘅新聞，政府係唔係矯枉過正呢，如果可以多啲包容，保留到一啲特色霓虹招牌，夜香港吸引力自然大增，唔使用政府大花公帑搞活動，都吸引到大批旅客嚟香港啦。
要搞好夜經濟，當然要配合較悠閒同自在嘅氛圍，太過家長式管治嘅社會，自然唔受旅客歡迎。不過，政府早前發表嘅《控煙策略諮詢文件》提出多項辣招，好似想同夜經濟打對台。好似建議效法新西蘭準備在兩年後禁止向2009年出生人士售煙的做法，實驗無煙世代，這完全侵犯整個世代成年人的選擇權，再者，有關措施喺全球只係得新西蘭實施，而當地容許電子煙流通以作為替代品。若建議落實，勢將令香港成為控煙最嚴厲嘅城市，年輕旅客日後訪港可能出現買唔到煙嘅尷尬情況，仲點會揀嚟香港旅行，夜經濟更能復甦啦。
今次控煙諮詢另一辣招是提出大幅增加煙草稅，其中計劃增加煙草稅佔零售價至75%，直接增加旅客在港買煙成本，自然減少嚟港次數。對本地煙民來說，加速轉向更便宜的選擇，令本港私煙問題更為猖獗。
吸煙與否，係每個成年人嘅選擇，在唔影響其他人情況下，確有必要給予多些包容，咁先對本港夜經濟、旅遊業有幫助啦。
曹參國
註：專欄作家言論不代表本網立場
