施政報告嘅主題係搶企業搶人才，當然中環人就好明白喺疫情底下香港做生意有幾困難，海外客戶又唔能夠見到面，精精靈靈嘅中層管理人員唔係話要返家鄉就移居他方。但係施政報告冇撤銷樓市辣招，淨係畀第日攞到永久居民身份嘅人退回印花稅，呢啲七年大計係咪真係留得住人才呢？反而簡簡單單保留返粉嶺高爾夫球場就話不走回頭路，真係令人摸不着頭腦。
上個禮拜我曹老闆去咗107動力舉辦嘅「智圓雅聚」，呢個月搵咗金融發展局主席李律仁資深大律師嚟講香港金融嘅發展，佢一開場就讚施政報告用搶人才做標題，之後幾日全世界嘅媒體都攞嚟做頭版，真係幫香港省靚咗個招牌。咁當然李大狀仲講咗好多香港同新加坡喺金融制度同埋資金池方面嘅比較，香港仍然贏出幾條街，佢仲話嚟緊呢個月會去歐洲參加四十幾場國際研討會幫手唱好香港。
呢次午餐會喺好隱蔽嘅渣甸山居民協會中菜廳舉辦，好耐都冇去呢個隱世嘅會所，地點靜中帶旺，而且中菜大廚係來自翠亨邨名廚，出品真係唔錯，但係要入會就要現有會員介紹啦。當年嘅會員非富則貴，賭王何鴻燊都係發起人之一。
呢餐飯最令人回味嘅係香蔥炸子雞，嗰陣蔥頭嘅香味同炸子雞好夾，真係唔覺意就要食多碗飯。仲有名菜蝦多士，少有嘅做到冇油味同埋黃金香脆，仲有一定要試嘅杏汁豬肺湯。呢啲會所係開埠初期就已經做緊商界交流聚會嘅角色，唔好以為淨係飲飲食食，好多大刁都係喺呢啲會所傾返嚟。
講返粉嶺高爾夫球場，就已經贏晒新加坡嘅高球場，施政報告先話會開拓到三千幾公頃土地發展房屋，而家收返粉嶺高爾夫球場只不過係九公頃土地，真係九牛一毛，可唔可以保留返呢九公頃做公眾高爾夫球學校或者高球公園，香港咪可以繼續有一個景點又唔使納稅人資助，又可以吸引海內外嘅高球愛好者嚟香港打工。
