自從香港浴火重生後，啲闊佬嘅慈善活動特別暢旺，連小富由儉嘅財主都話要大力做慈善。
有日收到個電話：「喂，Louise，我諗住捐錢去中大醫學院呀，你有冇睇新聞呀？嗰7個DSE狀元，有5個尖子都係揀中大嘅醫學院，唔揀港大呀，你睇你母校幾失威。人哋中大醫學院搞個環球醫療領袖培訓專修組別，係全港收生至Top嘅，幾有睇頭！我哋捐嘅錢都係Smart Money，捐錢都要計數，唔通捐俾啲扶唔起嘅鈍胎，石沉大海咩？」
小妹回敬一句：「阿哥，你捐錢都係諗住老咗有乜依郁，等人留返間病房俾你，有最Top嘅醫生會診咋！」
富豪特別喜歡捐錢畀醫院，可能考慮到老有所需。已故慈善家何伯──何英傑，曾經捐5,000萬俾養和醫院，話老咗有病時，最緊要留返間病房俾佢。
近排連大劉──劉鑾雄都用佢「劉鑾雄慈善基金」，喺廣州市中山大學附屬第一醫院，捐建咗一幢「劉鑾雄樓」。呢幢中山一院新地標，連接埋「曾憲梓大樓」，後生嘅可能唔知曾憲梓係乜水，佢係愛國商人金利來領呔創辦人。早年中山醫院獲新地（016）創辦人郭得勝捐錢，但就要同蔡繼有夾份，聽講恐防蔡繼有「縮沙」叫佢俾咗先；兩人都係祖籍中山，係早年返大陸捐錢嘅香港有錢佬。
大劉祖籍潮州，曾憲梓為梅縣人。無獨有偶，雙雙都選中山大學來做慈善啵。佢兩位善長都曾經做過換腎手術，深明受病魔纏繞之苦。曾憲梓生前有幸獲中央安排，1998年就喺中山大學附屬第一醫院做換腎手術，手術令他多活21年，當然要感謝中央啦。好幾年前，大劉接受訪問時曾透露，換腎手術期間亦經歷唔少，亦試煉出與甘比的「真愛」。正所謂同病相憐，去年大劉慈善基金捐咗200萬俾「腎基會」，即香港腎臟基金會，幫助一下要洗腎嘅病人。
但講到最Smart嘅捐款，一定係港大嘅李嘉誠醫學院，當年誠哥捐10億相當震撼，除咗命名之外，還有對某些科研有First Right of Refusal，即是如果有人買相關嘅科研成果，要俾誠哥相過先，雙方同價的話，誠哥就可優先購入，所以做慈善都要識打算盤㗎。
Louise
https://www.facebook.com/louisewong15
註：專欄作家言論不代表本網立場
