話說今年天氣熱又唔夠雨水，大閘蟹缺貨。但股市大閘蟹早已一籮籮。今個禮拜同林本利博士午飯，傾起佢有個理財班嘅學生中伏，幫襯銀行買咗同小米（1810）掛鈎嘅ELN（Equity Linked Notes），即係金融海嘯時累死好多人嘅股票掛鈎票據囉。呢位人兄喺小米股價$22、$23做ELN，近排小米得番$9左右，以百萬計嘅退休金化為烏有。當然又係問點算好，林本利經常苦口婆心同佢理財班嘅學生講，小心銀行啲RM（Relationship Manager），一踏入銀行就向你sell嘢。而好多都係「奪命金」，但往往跌市先知中伏。
【自製入息證明】
9月初，有個asset rich、cash poor嘅記者行家致電俾我，謂有朋友介紹一種投資，可以唔使賣樓繼續收租，每月可以淨袋cash嘅投資方案，以解她乾塘之困局。叫我陪佢去聽吓以防被騙，我咪當去放蛇，呢啲最耍家！
去到尖沙咀，原來就係「買特大保單 送演唱會飛」嗰間保險公司。一入門口，落地玻璃兼無敵海景寫字樓，十足酒店大堂咁，有個咖啡bar香氣四溢，心諗：「羊毛出自羊身上」。
聽完投資顧問講解，其實就係將我朋友嘅磚頭攞去轉按，繼而攞嚿錢出嚟，買張特大（涉幾百萬元）嘅保單，謂只有此類保單，先至有保證4厘多嘅回報，計埋嚿磚頭每月租金收入，還咗按揭，仲有cash袋，咪解決到老友乾塘問題囉，簡直perfect到呢……但老友冇份工又點做按揭呢？原來會安排第三者幫你「製造入息」，按指示連續3個月存款入銀行「扮」有收入，跟住呢啲二、三線同保險公司合作嘅銀行就會批核按揭。
此舉令人諗起2008年美國嘅次按風暴。嗱，一旦按揭息口高過保單嗰4厘幾回報，仲唔奪你老命！我呢位行家非財經記者，但聽到「製造入息」已非她杯茶，再問律師朋友，更不會犯險。其實層樓幾廿萬買返嚟，不如賺少啲將佢脫手，套現擺入銀行做定期好過喇。
【銀行與客戶零和遊戲】
講起銀行RM，今年初，接到渣兜銀行個RM call，謂想送利是封畀我咁有心。明知都係想sell野，冇所謂嘅咪睇吓馬騮戲。哈，竟然sell歐洲基金！一句就「車」埋去：「到時就算基金賺價，滙水蝕又點死呢？美元走強呀！」佢就即刻縮。
跟住見戶口有條未用credit line，又再sell借美元去買張大保單，玩保費融資，話月月有息差賺，好多客都做，坐住賺喎。我再彈佢鐘：「借錢個息口係定息我就做。」見我刀槍不入，利是封都唔記得送俾我。超！你估我又貪你啲利是封咩，攞下市場訊息而已，回想起嚟，如攞咗啲利是封兼買埋啲奪命金，我就嘔突。
好多RM唔記得累客輸錢，幾年前空咗日圓賺緊錢，打電話嚟叫我平倉，當然之後日圓仍跌，賺少咗喇。到我short美金，long英鎊輸緊錢時，又唔見佢早少少撥個輪嚟溫馨提示平倉。個客輸錢，即銀行贏錢。11年前上映嘅《奪命金》，真係幾時睇都啱。
Louise
https://www.facebook.com/louisewong15
註：專欄作家言論不代表本網立場
