BM專訪|27歲達成財務自由 葉子:第一筆炒股資金 靠走堂去地盤紮鐵

|

今年只有27歲的葉子,一身運動健將的身型,訪問當日,帶記者走入地盤,拿起紮鐵架生駕輕就熟,「炒咗股咁耐,依家返地盤再拎起鈎紮鐵,又逗鐵又開料,真係好辛苦,我真係唔知當時兩年時係點捱過。」曾經的地盤紮鐵工,今日已成為獨立股評人,靠投資闖出另一片天,談到身家,他淡然表示:「我諗我大學畢業出黎冇幾耐,已經好快財務自由。」

要講一個紮鐵工,如何鍊成財務自由,就要講一個不稱職的大學生故事。葉子當年順行考入香港大學物理系後,已訂立清晰目標,「我17歲睇《窮爸爸富爸爸》本書,同埋玩佢隻cash flow game棋,原來可以創造被動收入之餘,令到自己可以時間自由,我要做到呢樣野,我需要資本。」

紮鐵的日子 天天被問候

為了短時間內儲錢,他基本除了大學一年級,首兩三個月有努力讀書外,其餘時間都走去做兼職。想當年香港有「十大基建」,紮鐵工人短缺,人工自然水漲船高,於是本身的大學生的葉子,走堂去建造業訓練議會,朝八晚四學紮鐵,最後順利入行成為職安真漢子,「當時我日薪1000蚊一日,當我返22日,咁個度係兩萬二蚊既人工左右。」

或者有人會質疑,葉子博命打工,放棄學業不務正業?但其實他只係用另一種方式學習。他坦言,回首紮鐵的那段日子,除了體能上的辛苦,還有心理上的壓力,特別是在地盤工作時,面對紮鐵老師傅「親切的問候」,「總之你做乜都錯,行得慢係錯,攞得太多又錯,攞得太少嘢又錯,唔除衫又錯,除衫又錯,總之做乜都錯。」

炒股初哥落場即輸錢

於如此高壓的工作環境,他一做就做了兩年,留得低,一來要搵錢,二來他希望學得一門手藝,第三個原因,就是他記得父親曾講過一句話,「爹哋自細教我,好多人IQ唔係差好遠,但有乜嘢令到啲人成就有分野?係EQ,係同人哋情緒共鳴嘅能力。」

他相信EQ決定一個人的修為有多高,於地盤工作日子越久,他就越諒解老師傅的壓力,「佢以前都係受咗啲侮辱,先可以去到今日師傅呢個位置,加上又熱啦,年紀好大啦,咁佢都需要一啲位發洩。」他漸漸在紮鐵世界學懂設身處地,以高EQ應付高壓,他坦言此令他往後炒股時,更能冷靜地作出投資決定。當然,他炒股路絕非一直一帆風順。

每日紮鐵,一星期七日幫人補習,總算儲到第一筆入市資金,當時潮流興炒國策股,做足功課,進行基本面分析,思前想後,終於決定將當時辛苦儲起的約7萬元,落注一隻環保股,「我記得由4個幾一路追追追,追到我用接近5個幾呢個價錢去買,一買!大鑊!已經買咗歷史高位,而呢個歷史高位,到而家都未被超越過嘅。」買入後即日回調一成多,「輸咗八九千蚊,好唔開心,八千蚊唔係一個細數啦對我嚟講,但係最重要係輸埋個鬥志呀。有一排完全唔睇股票,我見到就嬲好忟憎。」

自修鍊成自己一套炒股心法

痛定思痛,他決定重整旗鼓,不停上投資班學習,「慢慢了解到原來市場上,大戶運行係有規律,我嘗試代入咗佢哋。」他表示,當時每日紮鐵、補習、上堂後,凌晏12時他就全力「做功課」,用幾小時去細閱上市通告,研究上市規則,「當時一日係睇幾百張嘅通告,瘋狂睇,我唔知自己睇啲咩開始,但慢慢你就知啲野有pattern,有劇本。」他表示,市場只是在玩一個人性遊戲,大戶設好陷阱,令散戶散以情緒管理。

一路紮鐵,一路練EQ,一路學炒股,結果於市場上交了50多萬學費,終於掌握自己的節奏,「一定係超過呢個數,我先有今日。撞嚟撞去,先發現原來大戶做嘢係咁。我成日話係好單調,我成日話好似超人打怪獸咁,係有劇本呢套劇本係你同我都背得出。」他表示,到今日他一個月只花15分鐘「做功課」,以尋找市場上有機會炒高幾倍股票。

今日他形容自己已財務自由,年紀尚輕,還有甚麼人生目標?「我想去唔同地方去旅居,

另外係去非洲做義工,睇吓有冇嘢可以幫手。有啲地方係每日係諗住點樣生存,點樣避過戰火,有乾淨嘅水飲。我哋咁幸運嘅時候,就覺得自己有義務去幫一啲世界上其他啲有需要嘅人。」

 
 

密切留意BossMind動向!立即CLS

FB    Instagram    Youtube

#
Social media & sharing icons powered by UltimatelySocial
error

Enjoy this blog? Please spread the word :)