TVB財技,好多藝人嘅演技|千頌C

TVB財技,好過好多藝人嘅演技|千頌C

千頌C | 2021.08.26

閱讀全文,歡迎加入會員

已是會員? 登入帳號
早晨,晨早流流有文,好明顯係因為噚晚寫時已夜深。好啦,今朝同大家講TVB(511)份半年業績,又搵吓啲得意小觀察。
1:循例睇bottom line,半年講緊蝕2.8億元,其實好咗架啦,上年同期係蝕2.9億,相差只係954.2萬元。假如上年沒有政府「保就業」筆錢呢?其實係蝕少咗4300萬元,條大數係好咗…少少。睇Top Line,半年12.48億收入,都比上年同期多咗,多咗2195萬。
2:我都明,大家都會好關心TVB有冇廣告,業績其中一句,係好正能量:「香港電視廣播的廣告收入由3.5億元增加31%至4.6億元,增幅令人鼓舞。」不過,睇業績來講,想知一間公司係咪真係做得好,永遠都要睇埋行家條數。沒有比較就沒有傷害,電盈(008)旗下免費電視Viu,半年做2.56億元生意,其中廣告收入1.88億元,比上年同期多咗66%,仲鼓舞。
3:正所謂無記正能量,業績話收視「遙遙領先所有其他本地免費電視營運商。」仲話「無綫電視在業界保持強勢領導地位,在年輕觀眾群及高收入觀眾群中佔據的觀眾份額分別達到85%及88%。」年輕觀眾群?真?不過當我諗到,後生仔傾吓偈嘅後生仔都年過40,我又好似明白了甚麼。
4:繼續無記正能量,通告指,「為加強綜藝節目製作實力,本集團委任娛樂界兩位著名資深演藝人曾志偉及王祖藍加入高級管理層,兩人於香港及中國內地的內容創作及直播帶貨方面均具有豐富經驗,且於娛樂界擁有廣闊的人脈資源。」其實想講好耐,佢兩位空降入去後,頭炮個節目名叫《開心大綜藝》,個名,好老尷。
5:有一點係,TVB 其中一個強項--中港合拍劇又點呢?期內來自聯合製作劇集項目之收入減少,導致聯合製作收入由1.4億元減至9100萬元。呢度減啲,嗰度又減啲,上半年來自中國內地業務的總收入由3.56億減至2.98億元。
6:TVB 上星期公佈「食士多神Deal」,就知佢好著緊Big Big Shop。咁就當然,因為期內大台網及電子商貿的收入,減15%至5200萬元;按年少賺41%至得返1800萬。想知到底有幾多人幫襯,就要睇商品交易總值,條數係按年增加10%至6200萬元,訂單數目98,700,平均訂單值約627元。沒有二次比較就沒有二次傷害,hktvmall 今年6月條數,以日計算,平均每日訂單已經有36,500單,平均每日訂單總商品交易額1,640萬元,成個6月訂單總商品交易額4.93億元。
7:TVB 條數,就大約係咁上下。不過重中之重係,大家唔好忘記「食士多神Deal」條款,如果成功交易,交易代價用2億,但只有7000萬係俾cash,另外仲有1.3億找數方法係,派啲藝人去幫士多賣廣告,當係廣告費填咗條數佢。如果take 埋注資option,total 就要喺士多「收返」2.3億廣告費。
留意返,雖然2.3億唔會100%同一次過入帳,但純for 比較用,TVB半年廣告收入,只係4.6億。
8:結論係,TVB財技,好過好多藝人嘅演技。冇咩事,我返去睇Viu。

——————

密切留意BossMind動向!立即CLS

▴FB

▴Instagram

▴Youtube

千頌C
 | 2021.08.26
分享這個帖子
文章精選
科指變身的契機:年尾有望「智能突變」|盧卡股