Bossip|邊個夠佢吋 半島名人soufflé|Louise

Bossip|邊個夠佢吋 半島名人soufflé|Louise

Louise | 2022.06.25

早前「中環吋嘴」工厦小王子楊國佳,相約即興到半島酒店食個brunch,但Gaddi's早已爆滿,唯有坐lobby。佢老哥鍾情半島大堂樓底夠高兼有live music, 話要感受吓消費氣氛。 

眼見相熟的經理級半島員工,好殷勤咁開門迎客,「吋嘴楊」竟然口痕話:「 吖,條友咁高級都走去開門,可能好耐無開工,咁鬼開心嘅?」不期然要駁佢:「 阿楊,做酒店員工好慘㗎。聽聞早排最淡静嘅時候,成間半島酒店得兩間房租出咋,家陣見番啲客仔、有工開 ,梗係好開心啦。」 

半島九吋souffle並沒失傳,計及加一後五百蚊有找。

八卦踩去樓上的Verandah露台餐廳,brunch自助餐人頭湧湧,價錢絕非平民化,要900幾蚊一位,莫非呢啲就係井噴式消費?生意佬即是生意佬,「吋嘴楊」話:「食材貴咗好多呀,尤其飛機貨。」自認I belong to Peninsula嘅「吋嘴楊」眼轆轆周圍好招積咁講 :「 啲客同埋侍應質素都跌哂watt喇 ,我哋呢啲老客仔就知,同以前冇得比。」

特意叫大堂經理Sammy,柯打一個經典嘅九吋soufflé配以薑汁加Grand Marnier橙酒,以彰顯佢老哥「識嘢」。呢款夠晒尺寸嘅soufflé要喺Gaddi's餅房焗,唔係人人識柯打,識柯打嘅有已故爵士邵逸夫、大劉、李國寶、鄧肇堅個仔鄧日新呢啲半島老客仔,名副其實「名人soufflé」 ,「吋嘴楊」即刻搶住話:「仲有我楊國佳!」

左是楊國佳,右是半島大堂經理Sammy招。

半島甜品大廚一接到柯打,可能英雄有用武之地即刻問Sammy:「邊個客柯打?」呢個直徑九吋soufflé要保持堅挺冇返咁上下嘅功夫唔掂。Soufflé駕到,醒目Sammy知道識食就食面嗰層立即趁熱來serve,「吋嘴楊」邊吃邊老懷安慰話: 「呢兩、三年疫情搞到好多食肆執笠,就算開得番都跌哂watt,好多出品都失傳咗。呢款soufflé 我以前喺淺水灣酒店食多,係用銀碟來上㗎。」

Louise

密切留意BossMind動向!立即CLS

FB     Instagram    Youtube

Bossip|邊個夠佢吋 半島名人soufflé|Louise
Louise
 | 2022.06.25

透過財經內容來娛樂讀者,務求文章「好睇、過瘾、有料到。」

分享這個帖子
文章精選