Bossip|通天經紀仿製「富豪飯堂」 鹹得冇道理|Louise

Bossip|通天經紀仿製「富豪飯堂」 鹹得冇道理|Louise

Louise | 2022.09.03

由「前」福臨門及「前」國福樓班底搞嘅「叠囍居」,有「香港第一樓面」陳年(阿年)坐陣,聽過唔少金融人提過。近排喺灣仔骨場「新瀛閣」隔離三湘大廈開多間分店。

上周六與友人踩場去食晏,領教到乜嘢係浮誇,亦勾起唔少陳年往事。

一入大門口,見牆上鑲咗副天九翅,呢個年代食翅都要低調啦,酒店都已經唔serve翅,好似唔係好合河車,旁邊仲有副500公斤嘅野生龍躉皮,認真夠誇。

酒櫃入面,驟眼睇好似陳年佳釀,望真啲label舊到發霉,幾支label 1955、1950、1934 嘅「滴滴金」D' Yquem顏色好似普洱咁,俾你夠唔夠膽飲?

打開菜牌仲誇張,原來係大廚炳叔,佢係前港督御廚又係賭王葉漢、鄧肇堅爵士嘅家廚,不過呢啲都已經作古嘅上世紀名人,在座食客都未必識。

點咗窩鵲鴣粥、蟹皇翅、鮑魚酥、燴牛脷牛尾、乳豬,大廚都一把年紀,可能味蕾有點退化,食物真係「鹹到傷」,好彩鮑魚酥只叫一隻,食咗面頭隻鮑魚,下面嘅醬汁真係哽唔落,寸嘴友人謂:「呢度都係名都咁嘅格局,請客就唔見得人啦 。」


鷓鴣粥仍有薯粉糰,蟹王翅仲硬倔倔未發得夠時間,企堂力薦甜品沙翁,一上枱友人即話:「千年油炸㗎?咁深色嘅?」 咬一口後,都要懷舊一下唱梅艷芳首歌「心仍是冷」,彈鐘也來不切。


小妹身先士卒試煲牛脷牛尾,咬咗一粒口脷,唔想再嘥牙力,嘍咗搵紙巾包住算喇,完全未夠火喉,朋友打包返屋企自己再加蕃茄,砵酒再炆一個鐘先掂。

餐飯埋單近$3000,經理送上幾張$300 coupon下次用,但何日君再來呢?

幸好當日嗰位被冠為「天下第一樓面」嘅阿年放假,聽福臨門啲食客反映,阿年把刀好利,何解?專介紹客人食貴野囉,所以算係執番身彩。


食完餐飯,飲咗壺普洱解渴,心有不忿向一金融老手打聽「叠囍居」背後老細乜料?

哈哈,原來係前通天經紀Charles Lai賴紹榮。廿幾年前傍住林建岳,擔住雪茄,玩跑車,開遊艇,此金融老手對此君評價:「乜料?肥田料囉,以前係香港仔Joyce building有間中餐,有間西餐,佢話林建岳係佢老細,擺架林寶堅尼喺樓下,佢個仔都話佢浮誇唔睬佢,總之係皮笑肉不笑嗰啲人啦。」

關於此通天經紀嘅「傳奇」,讀者有興趣就自行上網查下,在此不詳,此君之舊聞都幾精彩㗎。

Louise

https://www.facebook.com/louisewong15

註:專欄作家言論不代表本網立場

密切留意BossMind動向!立即CLS

FB     Instagram    Youtube

Bossip|通天經紀仿製「富豪飯堂」 鹹得冇道理|Louise
Louise
 | 2022.09.03

透過財經內容來娛樂讀者,務求文章「好睇、過瘾、有料到。」

分享這個帖子
文章精選