Bossip|富豪慳家有法 黃志祥一個司機「兩用」|Louise

Bossip|富豪慳家有法 黃志祥一個司機「兩用」|Louise

Louise | 2022.08.20

生不逢時嘅海洋公園Fullerton酒店終於開張。正所謂新屎坑,梗要去Staycation睇吓乜料。

上周六,撞正酒店老細之一嘅信和集團黃志祥兩父子喺Fullerton巡視業務,聽到黃志祥正鬧緊個酒店總經理,即刻豎起耳仔聽吓,黃志祥有點勞氣地話:「如果啲錢係你自己嘅,會唔會咁樣嘥啲嘢?」

成日聽到幫富豪打工或招呼富豪嘅私人銀行家呻,啲有錢佬點孤寒,其實富豪之所以係富豪,就係有佢條數計,即使對仔女都會勒住勒住㗎。

一個司機兩個崗位

好似黃永光鍾意玩吓法拉利,最叻係去英國搜攞筍價二手車,手頭有部1962年既古董法拉利。咪睇信和旗下嘅黃金海岸泊滿富豪遊艇,黃永光就一艘都無。

最精明都係黃志祥,怕司機車完老細上船後冇嘢做,索性叫埋個司機學揸船,咁又慳番唔使養住個船長,個司機又肯上進,去考埋個船牌,咁份工就更穩陣啦

信和集團總部位於尖東,黃志祥放工後都係徒步坐港鐵過海,再叫司機喺金鐘接佢,避開條富貴隧道,一來一回慳150蚊隧道費,又唔使塞車,富豪嘅時間先至係錢嘛!

幾年前在星航的lounge撞過佢老哥坐飛機返老家星加坡,喺lounge食完一餐後,服務員又好識做打包份三文治俾佢攞上機,可能夜晚到達新加坡後,晚餐都唔使啦。

孤寒都可以出名

以往好多富豪都慳到出汁,已故嘅小甜甜更加係慳家女皇。以往記者會完後,小甜甜叮囑員工將剩低嘅西餅打包攞走唔好浪費,咁都好過中巴顔氏家族曾以隔夜西餅款待小股東嘅。

新地創辦人郭得勝都係慳家王,做成單刁喺福臨門慶功請員工食餐飯,自己都係叫碟窩蛋牛肉飯,咁在座員工唔通叫魚翅鮑魚咩?

佢胞弟郭得標喺福臨門咬咗半隻鮑魚後,投訴冇「溏心」,經理準備換過隻俾佢,佢即截住話「唔好嘥,等我食埋佢啦」,但條數又點計呢?唔通收佢兩隻鮑魚錢咩?

已故工廈大王楊耀松對「孤寒」則有另一番解讀,佢請食飯通常「冇骨落地」,農曆年又會去Las Vegas避年唔使派利是畀員工,坐飛機亦只係經濟艙,認為「孤寒都係出名的一種方式啊。」

現時喺柴灣、觀塘、長沙灣以佢命名嘅工業大廈,原來亦有數計,因為唔使俾錢賣廣告都有人識自己喇。

喺柴灣嘅「楊耀松工業大廈」有個小巴站頭,乘客落車都會嗌:「楊耀松有落!」釘咗近廿年嘅佢,真正名留千古,吹脹!

其實富豪孤寒,因為佢哋搵嘅錢有血有汗,通常「假富豪」、乜乜博士呀,先會周身名牌,米芝蓮食府及名人合照四圍share,所以孤寒財主先係「真富豪」呀!

Louise

https://www.facebook.com/louisewong15

註:專欄作家言論不代表本網立場

密切留意BossMind動向!立即CLS

FB     Instagram    Youtube

Bossip|富豪慳家有法 黃志祥一個司機「兩用」|Louise
Louise
 | 2022.08.20

透過財經內容來娛樂讀者,務求文章「好睇、過瘾、有料到。」

分享這個帖子
文章精選