舖睇得明|Man Hung生日會前的掘金旅程|鄭得明

舖睇得明|Man Hung生日會前的掘金旅程|鄭得明

鄭得明 | 2022.01.18

Man Hung(化名)係一名相當勤力,但思想比較簡單嘅地產經紀,年約40歲,有5年左右嘅舖位經驗。有次我去附近食晏偶然撞到,傾開閒偈,隨口問下佢點解做呢行?點知Man Hung好認真咁思索,望向遠處並表示:「經紀一輩子可能會有一千次做大Deal的機會,而我的目標從頭到尾只有一個,那就是在今年同女友開生日會前,成為100萬年薪的經紀!」

「咁奇怪嘅?!點解要set 100萬target,又唔再高啲或低啲呢?」我疑惑地問佢。

「因為100萬加埋已有嘅積蓄,我就夠首期買樓,同女友共築愛巢!」Man 情不自禁露出幸福的表情。

「同好多朋友happy hour,都有講過畀人聽自己做經紀的目標志向,啲人聽完通常以為我一定口齒好伶俐,所以先敢set 100萬年薪目標。其實剛好相反,我的口才並不好,10個經紀裏面我大約排第7至8,但我嘅強項係勤力update,通常我每日都會update 50個盤以上,當正自己係人肉比特幣掘礦機,去尋找隱世靚舖!如果當月佣金收益唔理想,再加碼一倍update,誓要搵到個筍舖去推,女友教落『將勤補拙』!」Man無私分享自己嘅開單絕技──「勤力」!

呢種工作態度十分值得欣賞──目標清晰,而且知道自己的缺點和優勢。話說有日Man如常開turbo update,突然收到個電話,原來有準租客想查詢深水埗一間吉舖的租金價錢(因為佢掛咗塊招租板在舖面上)。

「唔好意思,啱啱問咗業主已經租出了,不如我幫你在附近睇下仲有乜嘢旺舖放租,一次過回覆你。」收線後Man即時翻天覆地update附近舖位會否放租,連不放租售嘅舖都打電話問埋,確保唔會有漏網之魚。

Man心諗:雖然我目標係做買賣食大茶飯,但係租都唔好放過,起碼當常餐食住先。結果順利在附近搵到一個靚租盤,過咗十天順利搞掂咗單租。「都好,離今年搵100萬目標又近咗一步!」Man一邊咬住麵包醫肚,一路替自己打氣。

眨下眼三個月後的一個早上,Man突然接到一個電話。另一端有位女士問:「請問你是否Man?」

「早晨,我係Man,小姐點稱呼?」聲音咁陌生嘅?Man心裏感覺有點奇怪。

「我姓朱嘅,你三個月前打過畀我,問深水埗嗰間舖有冇興趣放租/售。當時我話從來未諗過放嘅,你有冇印象?」朱小姐問。

Man:「Sorry,冇乜印象,不如你講番間舖嘅地址畀我聽吖。」

知道舖位地址後,Man開始回憶起來,趁機再問深啲:「我哋幾個月前傾過一次電話,點解你仲留有我電話號碼嘅?」

「因為當時我將你電話號碼順手寫在電話旁的通訊錄上。上次你問完我後,我都有問多一次屋企人會唔會賣,個舖係我哋屋企四個人持有嘅,今天大家都想分家套現,所以決定賣啦,咪打畀你問下情況。」朱小姐解釋。

「你真係醒啦,知道我有客搵呢一區,不如我而家嚟拜候你,大家傾下放賣方案。另外,你可以考慮簽個獨家代理畀我,等我公司撥多啲資源去幫你做推廣,希望可以盡快賣出。」Man即刻乘勝追擊。

因為上述物業屬於戰前樓關係,三層高,夠晒「大件」,位置十分當眼,缺點係交吉冇租收,亦冇入伙紙,結果Man成功同賣方傾咗一個相對低的價錢,以2,000萬放賣,然後馬上返公司向我報告。

聽後我驚覺價錢非常筍,馬上叫佢call咗幾個投資客落去睇,結果有個貴客以前有投資戰前樓經驗,完全明白冇入伙紙及可能較難承造按揭嘅問題,第一時間畀咗張票,仲簽定份合約。

「嘩!咁順利嘅,呢次仲唔發達!?」Man馬上打電話約齊業主上嚟公司簽約,朱小姐回覆要晚上8點後才齊人,亦都講咗其中一個業主喺外國,但已經有授權書,可以幫手簽名,似乎一切都萬事俱備。

朱小姐一家非常準時上到公司,Man禮貌地安排大家入會議室,正拿合約出來之際,突然電話響起,原來係買方打來,Man心諗:哈!肯定係問我搞掂未,咁心急㗎!隨即接聽電話說:「老闆,我正想搵你,請問你一陣喺邊個位置?眾業主已經到齊我公司,如無意外10分鐘後可以簽妥。」

「你唔好簽住,我而家要減多50萬才會買,因為諗諗下都覺係出高咗價錢,如果佢哋唔肯就算啦!」買方斬釘截鐵咁講。

「吓!咁大件事!老闆不如你聽下我講,呢件舖從來未放過賣,而且真係好筍……」Man焦急說。

「唔使再講啦,難道你叻得過我?!如果唔得就幫我取消份合約。」Man未及回應,電話筒裏頭已傳來Do…Do聲…買方收埋線添。Man露出哀求的眼神道:「老細,業主上晒嚟,個客又縮咗50萬,咁而家點算?」

「Man,你係時候迫啲潛力出來了。首先試下自己面對困難先,否則你唔會成長。你先整理下思維,行入去照講返件事,最少要頂5至10分鐘。我在隔離房聽住 (因為房與房之間隔音比較差,好易聽到雙方對話),如果最後傾唔掂,佢哋要起身走,我會第一時間入嚟幫你排難解憂,放心,我係你後盾。」我嘗試令Man鼓起勇氣面對。

我在隔離房偷聽佢哋情況,Man入去沒多久就聽到一陣起哄責罵聲,再隔一陣間移櫈聲起,似乎真係搞唔掂啦。我第一時間箭步敲門入房,以牙膏廣告式笑容同大家打個招呼:「大家晚安,非常多謝各位光臨,我係佢上司Dennis Cheng,想了解下單Deal而家進行到乜嘢情況?」

到底單Deal最後能否成功?主角Man目標的100萬年薪又會否達成?下回話你知。

鄭得明  利嘉閣地產商舖部高級營業董事


密切留意BossMind動向!立即CLS

FB     Instagram    Youtube

舖睇得明|Man Hung生日會前的掘金旅程|鄭得明
鄭得明
 | 2022.01.18
分享這個帖子
文章精選