舖睇得明|新龜兔賽跑之「學霸」VS「戰神」(下)|鄭得明

舖睇得明|新龜兔賽跑之「學霸」VS「戰神」(下)|鄭得明

鄭得明 | 2022.02.22

上回講到當第一季完結,P大勝84萬佣金,Wincy是否不自量力,竟敢越級挑戰Deal后?

第二季P可能因為業績拋離晒對手,動力細咗,「hea」的壞習慣又重現,開始放慢手腳。

Wincy旁觀心諗:機會嚟啦!她馬上發力,接連每月開咗一單買賣,而P在4、5月仍懶懶閒,只係6月份開咗一單買賣。第二季總佣金係74萬對94萬,Wincy追返20萬差距。

P開始察覺到Wincy每個月都有開買賣單,與同事閒談間有讚下佢叻女成日開單,咁啱在大堂等Lift又撞到,Wincy好奇問:「請教下師姐,你咁大動力返工搵錢,原因係乜嘢?」

「因為我目標係每年都要搵200萬以上去買股票或磚頭嚟投資囉!」P邊食朱古力輕鬆回答。「咁你呢?」P乘機問。Wincy托一托眼鏡道:「呢個問題問得好!我最終目標係想憑自己力量去將部門營業額提升為行業一哥,聽落雖然好似好虛幻,但聖經都有講『凡事相信,凡事盼望』」。

「好厲害呀,果然係讀書人,層次都唔同,有宏大理想!」P拍兩下掌叫好,心裡佩服文青外貌嘅小妮子,志向竟然咁高!但文人通常理論多多,得個講字,空談誤國,我哋呢啲冇墨水嘅就實幹興邦,睇住嚟啦小妹妹!如此一想,P就冇將件事特別放上心。

7月份一開始,P加快update,好快開咗兩單細買賣,而Wincy只開咗一單租。P見到即放下戒心,8、9月又hea住做,而Wincy9月份成功開咗一單3,000萬買賣,再追多20萬數。

第三季總佣金方面:P錄50萬,Wincy錄70萬。佣金累積:P錄264萬,Wincy錄220萬,雙方佣金只係相差44萬。

P終於察覺到Wincy其實係向佢挑戰緊,第四季一開始,雙方開足馬力call客鋤盤,你一拳我一腳,由10月鬥到12月尾,P開咗6單買賣,而Wincy開咗7單買賣。總佣金514萬對524萬,Wincy反勝10萬。大家叮噹馬頭,仲有最後兩天時間追。P不服輸,一定要鬥到最後,佢手上仲有位貴客張生一路都想買舖,但性格猶豫不決,覺得間間都好,可買可唔買,結果睇咗嘅筍盤一間間賣晒……

P出皇牌call張生出嚟睇四個舖位,暫且簡單分為A、B、C、D舖,立定決心今次一定要成功開到單。P心目中已經有個Target 盤(D舖),因業主趕住移民急讓套現,價錢可傾到低於市價約一成。

當張生準時出現後,大家馬上起程睇舖。兩個小時後睇晒A、B、C、D 四個舖,P隨即搵咗間餐廳同他坐低分析優點:「張生,首先你要從A、B、C、D先揀兩個舖出嚟先。」貴客思考咗一陣:「咁A同B啦。」P 心諗:Oh No!冇揀到Target(D)舖添!口裡卻說:「非常好!咁我哋忘記佢,先拎走呢兩個舖啦,剩下C、D舖你又點諗呀?」

張生有啲愕然,呆呆地回答:「兩個都差不多喎。」「咁不如我同你講解下啦,C舖係靚位置又當眼,不過租約就嚟到期,又要煩住重新傾續租同新租金之類,反而D舖叫價平,長情租客租咗超過十年了,門面又夠闊,我知道業主即將移民,可能會有驚喜價都未定。不如你開張支票我同你傾低啲價錢,如果傾唔到咪唔買囉。而且你之前睇嗰啲舖全部賣晒,仲升埋值添,歷史證明咗我介紹的舖全部都係靚嘢。」

張生聽完再諗一陣,終於動心:「好啦,咁你同我試下傾平10%啦!」,隨即開支票,結果當晚順利簽成,P反勝Wincy 30萬佣金。

但Wincy亦有機會笑到最後,因為有一單2,000萬買賣到價可以簽,順利完成佣金有40萬,上演終點前華麗轉身反超10萬元。但因為買方想租約期滿收返自用開餐廳,要帶埋出牌師傅到現場睇多次,結果晴天霹靂,原來個舖後巷畀人非法霸佔咗,出唔到食牌,5A和牛食到落口都要吐返出嚟,唯有幫買家再搵個位,Wincy感覺異常落寞,只好返公司再搵盤……

身體前傾、無力地伏在寫字枱前的Wincy深感可惜,辛苦了整年最後關頭輸少少,感覺就好似當成功向自己迎來,正想抓住時,突然一陣風吹來,抓不住,漸漸飄得很高很高,轉眼看不見了。一陣很累很孤寂的感覺充斥身心,冷靜的她不會告訴別人,因為沒人有興趣知道……

「Happy birthday to Wincy……」好拍檔Sam突然邊唱並捧一個蛋糕向她走來,跟住全組同事笑着出現一齊合唱生日歌,每個組員手上都拿着一份禮物送給她,令Wincy感動到眼有淚光,原來做嘢做到連自己生日都忘記了。

「唔緊要啦,今次輸少少咪下年再嚟過,起碼有個目標去鞭策自己。」主管Francis說。「原來仲有成組人支持自己,我不是孤軍作戰的。」Wincy諗深一層:2021年我係挑戰不可能,而最後只係影相輸少少,證明咗我係得嘅,目標算係超額完成了。2022虎年再玩過,今年呢八個字:「虎」力全開,如虎添「億」。

鄭得明  利嘉閣地產商舖部高級營業董事

密切留意BossMind動向!立即CLS

FB     Instagram    Youtube

舖睇得明|新龜兔賽跑之「學霸」VS「戰神」(下)|鄭得明
鄭得明
 | 2022.02.22
分享這個帖子
文章精選