舖睇得明|不能「搣時」招聘會之我有問題|鄭得明

舖睇得明|不能「搣時」招聘會之我有問題|鄭得明

鄭得明 | 2021.12.07

所謂「有人嘅地方就有江湖」,有舖嘅地方亦自然有舖位經紀。大家每朝落街,就會見到有舖頭做生意,人潮熙來攘往,也是白花花的銀紙在流轉,所以做舖位經紀真係商機無限,「錢途」無可限量。 

近兩年因為新冠疫情肆虐,令全球經濟停滯不前、大量精英失業;但有危就有機,因為舖位丟空引致價格大幅調整,引來「春江鴨」投資者趁機以折讓價買舖,令舖市成交大反彈,需求急增下公司亦相應擴張增聘人手,開創潮流於10月份舉辦第一次大型工商舖招聘會,趁勢吸引其他行業精英轉行加盟。

通過各樣渠道去宣傳後,到場人數相當踴躍,當中又以各行業嘅中層管理人員為主。未開始前我先趁機觀察一下在場人士,絕大部份都很好奇地東張西望,想了解多一些情況,除咗一位年約30嘅年輕男士,以及一位40多歲的女士,兩人表現高傲,盤起雙臂,貌似行內老手。

招聘會轉眼就開始了,首先是工業部董事上台講述工業代理範疇和特色,接着到商業部介紹代理日常工作情況,壓軸到我講解做舖位代理的特色和商機: 「現時全港有41,000多名持牌代理,其中有超過九成人係做住宅代理,從事舖位代理嘅少於1,000人,而全港舖位嘅盤口總數超過10萬個,基本上冇新供應,可想而知個餅幾大!

據統計,平均每月舖位買賣成交宗數有250宗左右(最高峯有500至700宗),每個月成交總金額約30億元,計算平均每宗成交共收2%佣金,即是有6,000萬佣金在市場產生,再加上每月租務成交總金額大約有4,000萬元,每宗平均收1個月佣金,又有4,000萬佣金在市場,等於每個月有1億佣金畀舖位代理去爭奪。

大家細想下,只要有人想開舖做生意,或者買舖作投資收租,都需要我哋分析前景和提供盤源。當今世界發展到元宇宙時代,部份傳統行業已經被淘汰或步入夕陽,反觀地產代理係難以被科技淘汰嘅行業。

以我入行超過30年嘅經驗來講,舖位代理係最冇可能被Al或者電腦等科技取代。因為呢門係講求人性化服務嘅生意,需要有豐富人生經驗、純熟嘅溝通技巧和掌握各類資訊嘅人才能勝任,簡而言之三個字「賣服務」,行內經驗反而其次。 

在我侃侃而談之際,台下突然有把男聲道:「我叫Michael,做住宅已經有7年,但住宅要返星期六、日,而舖位放銀行假期同五天半工作,啱晒我。你請我一定賺嘅,肯定交到數畀你。我做住宅年年都有獎攞,但講明先我經常遲到嘅,咁有冇問題先?」左顧右盼嘅Michael翹着雙腳問。 

「首先好多謝Michael嘅問題先,仲有冇其他人發問?」我微笑回應。

「有!」另一位目測四十多歲左右、貌似業內高手的中年女士續道:「我做咗住宅15年了,2019年因為有疫情怕感染所以辭工,錢方面我夠用啦,但又想搵啲嘢挑戰下過日晨。今日聽完你哋介紹之後,我覺得舖位比較難學同有挑戰性,所以有興趣試。但想了解下,你話有超過10萬個盤口,其實有幾多成有電話,可以聯絡業主先?因為我做住宅嗰陣時都係得六、七成左右有業主聯絡電話,否則我有能力搵到客但係冇聯絡都係白搞。」

「請你放心,香港所有核心區我哋差唔多有齊業主電話;民生區都有八成以上齊晒,你唔使擔心冇盤口畀你做,最重要你有貴客。做舖位代理肯定係地產行業入面最有挑戰性嘅,有同事可以一年搵過千萬落袋!」我回答該女士。

「咁人工方面以我資歷會畀幾多,同埋甚麼職位呢?須知道我並唔係普通sales嘅層次。」邊說時雙眼則從左至右打量在場人士一次,傲氣逼人。「你有10多年代理經驗,人工職位可以比普通sales高少少嘅,但要有工作證明,同埋如果有獎項提供就更好。通常做呢行的人比較關心間公司工作環境如何,有冇政治、是非之類,我可以保證部門唔會發生呢啲情況。」我輕輕一帶而過。

「至於Michael的問題,我嘗試解答下你。我細個嗰陣成日都好奇怪,點解父母可以天天清晨6點鐘就起身整定早餐才返工?後來先知呢啲叫「責任」。我做代理呢行咁耐,連一天都冇遲到過。公司係商業機構,收得人工,我哋就要準時上班同跑數,呢啲係我哋嘅責任。至於你話交到數但要求容許遲到,咁要視乎你交到幾多數先,呢樣我哋私下再談,但我可以話畀你聽,舖位部最跑到數嗰幾位都準時上班。」我回應。 

「我覺得呢行係英雄地,有數就大哥,幾時返工反而其次。呢點大家都明,交數先係責任。」Michael有少少不忿氣。

「當你去打工就覺得老闆執紀律太嚴格,如果你係老闆就覺得伙計冇責任心,大家都冇錯嘅,只係位置唔同啫。

舖位代理係講求用策略+行動去搵大錢嘅行業,我哋嘅焦點係怎樣才能夠將腦內創意産生嘅錢,再轉到自己銀行account度?而不是整日執着自己嘅返工時間。人生最痛苦莫過於我哋在夢裏揾到好多錢,睡醒後先發現自己仍然在床上。」我說。 

「我都有個問題,請問點樣可以盡快入職同返工呢?」另一位參加者問。「可以馬上填表作即場面試,confirm咗立即安排簽約。」我笑着回應其他場內精英。 

鄭得明  利嘉閣地產商舖部高級營業董事

—————————————

密切留意BossMind動向!立即CLS

FB     Instagram    Youtube

密切留意BossMind動向!立即CLS

FB     Instagram    Youtube

舖睇得明|不能「搣時」招聘會之我有問題|鄭得明
鄭得明
 | 2021.12.07
分享這個帖子
文章精選