收市閒情|試當真NFT事件懶人包|千頌C

收市閒情|試當真NFT事件懶人包|千頌C

千頌C | 2022.04.17

1:話說試當真出NFT,賣0.2eth,出6000個。0.2eth 而家大約4800港紙,若果成功賣晒,相信籌到近2900萬。

2:試當真出NFT,惹來好大反彈,俾人話又cap水又盛,有更多fans 係驚三位老細俾人呃。

3:咁聽埋個NFT性質,佢哋話唔係出張jpg就算,資金所得,會去達成四大目標(姐係NFT 所謂嘅Roadmap 或者一般上市公司嘅use of proceeds ),包括每日一片、搞舞台劇、開藝員訓練班、拍電影,咁NFT持有人會有獨家福利。

4:本身賣membership冇咩問題,其實概念好簡單,要sell都好簡單:用5000蚊買個會籍,買嘅係對將來會出現項目嘅憧憬,正如你買股票,唔少上市公司都係蝕住上市,TESLA 都蝕左好多年錢,最近兩年先真係賺。

5:重點都係要提大家,唔好預隻NFT有得炒,甚至有機會變0。不過持有人福利不變。

6:講得盡啲,呢個NFT,如果你一心諗住炒,你炒燶係你抵死。如果你呢5000蚊,係純買會籍,輸嘅唯一機會就係游學修走數加走佬。 呢5000蚊,其實就係買你對游學修嘅信任。信就買,唔信就唔買。

7:即係誠哥講嗰樣野,你買層自住樓,幾時買都冇問題。你買個NFT,係為個會籍,5000蚊你覺得值,佢個價只係帳面數,就算跌穿0.2eth 「招股價」都唔關你事。

8:而我實在唔明點解成件事個包裝,可以出事到咁。宣傳片豪哥已講明唔識NFT,其實揾Jessica、阿慈講都仲講得過,但豪哥哥你係老闆,冇可能係由你把口講「我唔識架」,你唔識又叫人買?

9:去到尋晚試當真,游學修三位老闆重申自己真係唔識,3個人,得豪哥哥叫做開始買少少Eth。咁點說服人買?如果到最後真係出左事,係咪可以一句話「我都話我唔識架啦」了事。

10:好啦,你話你唔識,只係諗如何達成4大目標。但點解連資金所得會點分配都唔講?話就話驚會變,咁變咪到時先變,但都俾人睇到你係有planning先啦。上市招股文件寫完use of proceeds,都唔代表完全冇走盞。

11:之後又話NFT嘢只係交俾兩個你相信嘅專家去搞。問題嗰兩個人,好多NFT問題都解答唔到。問專家點解唔收現金收信用卡,之後你俾返NFT我?唔講杜生,就連坂本龍一賣音符NFT都可以用信用卡啦。

12:「專家」就話,唔收信用卡係希望帶大家進入metaverse,學買NFT,之後仲可以自己買其他project。第一,對fans來講,未必個個人想學,好多人只係純粹出於對試當真既支持;第二,「專家」你揸住咁多project,咁講會唔會太有利益衝突?

13:成件事好不安係,老闆完全唔識,佢只信兩個「專家」。結果本來最叻包裝嘅老闆,唔識將件事包裝得好好睇睇。而呢兩個「專家」,suppose 去幫佢哋解答fans問題,但出到黎完全唔Presentable,亦唔見得有說服力。(竟然話自己用接受好多傳媒訪問,證明自己信得過?係咪太搞笑?著名嘅比華利山騙案,騙徒黎偉業都有名有姓,多次接受訪問,都呃到唔少名人共4億,苦主傳包括謝安琪)。

14:三位老闆講到明出咗之後,唔會揾人去維持市場秩序,但轉個頭又話,出NFT係等大家有二手市場去賣返出去。都冇人去托價,就唔好俾人有個炒嘅希望。

15:出NFT賣Membership 其實我覺得冇問題,重申一次,呢5000蚊唔好預有炒價,只係買你對游學修嘅信任。但失望個位係,由於幾位老細對NFT完全冇認識,於冇事前學習之下就出呢個project,令成件事包裝完全失敗。大家咁憂慮,其實唔係冇原因。

16:咁6000個賣唔賣得晒?計一計,佢YouTube 會員whitelist分配數目,大概都會有個概念。最貴會籍月費800蚊「???」同200蚊盲撐毛共有1818個,100蚊會籍死忠毛有1125個,至於50蚊會籍認真毛,有3518個,total 6461個。

17:最後,其實我諗咗兩日寫唔寫呢篇,因為寫試當真,其實係好危險。不過,你最後見到呢篇文,即係我豁咗出去。

利申:15個月死忠毛,真心希望佢哋最後化解到fans們嘅憂慮

by千頌C
FB專頁

密切留意BossMind動向!立即CLS

FB     Instagram    Youtube

千頌C
 | 2022.04.17
分享這個帖子
文章精選