舖睇得明|我開第一間地產代理舖首月50萬生意 卻沒料到……|鄭得明

舖睇得明|我開第一間地產代理舖首月50萬生意 卻沒料到……|鄭得明

鄭得明 | 2021.09.21

閱讀全文,歡迎加入會員

已是會員? 登入帳號

我相信大部份打工仔都夢想過做老闆,希望憑實力,證明自己嗰套係得嘅!不過第一步,係要搵個信得過,又有口才嘅人(做經紀把口好緊要)一齊拍住上,咩事都可以有商有量,成功機會自然大好多。

上期講到筆者入咗地產行業短短兩個月,就毅然出嚟闖,感覺好似係少林寺學滿師出關逐鹿天下咁。「市場上有咁好搵嘅工,梗係第一時間搵死黨William(化名)出嚟組隊啦!」我嘅好朋友本身做開sales,口才一向非常好,但同好多人一樣,搵幾多洗幾多,冇乜積蓄。

表明來意後,我跟手發表咗近兩個鐘嘅「偉論」,內容都係講嗰啲一間變兩間,兩間變十間,再不久將來上市之類。William聽到如痴如醉,已經幻想緊日後點樣過富豪生活,二話不說就要同我滴血為盟打江山。不過William講明自己係白紙一張,完全冇地產經驗,而且亦唔夠錢同我夾份開公司。我話呢啲好容易解決,開公司嘅錢由我幫佢墊支,以後搵到錢再計返畀我,「做兄弟冇計嘅」!

如是者我哋一拍即合,馬上如火如荼咁計劃我哋嘅搵錢大計。

首先我哋要決定起步點,既然大家都喺荃灣區大,咁就由荃灣開始啦!我哋兵分兩路,各自係荃灣區嘅地產舖打工,睇下人哋啲公司要注意乜嘢,同埋市場有咩嘢樓係主打。憑以往做sales經驗,William好快已經掌握到箇中技巧,又努力同部份細炒家、投資者混熟,日日搵佢哋斟茶灌水擦下鞋。

而我就專注去了解其他地產公司嘅日常營運,「有咩要留意?盤源又點嚟?」所以我平均10天左右就轉一間公司返工。

匆匆3個月過去,要了解嘅基本了解晒,我就開始物色地方開公司,而William就繼續在地產公司儲投資者客和搵地產班底來加盟,再過多兩個月,我哋成功在荃灣南豐中心寫字樓建立人生第一間地產公司。

開張第一天,有十幾個炒家、投資者到賀,我哋逐個傾偈鳴謝光臨,其實係逐個摸底,了解佢哋鍾情咩類型物業,投其所好,目的自然係將來嘅佣金啦!舊時嘅投資者比較簡單,只需要有錢落袋,唔會好大貪。

最大原因係當時地產行業可謂冇監管,極不透明,充滿神秘色彩,個個投資者好似摸着石頭過河,搵食都要靠經紀。總之經紀畀貨,表面計數有水位賺,就入市。最理想係正式成交前可以「摸出」,一個「華麗轉身」賺錢走人。通常唔使「上會」做銀行按揭嘅話,投資者會更豪爽畀高佣。

投資者入市固然基本會畀1%佣金,不過最「肥美」嘅(佣金)係佢哋「出貨」嘅時候。我哋會先同投資者商量好幾多錢佢會肯收訂「摸出」,而我哋目標唔係收成交價1%佣金,而係收預設訂價以外嘅差價作為佣金。例如投資者答應咗100萬肯賣出手持單位,而我哋最終做咗110萬,即是有10萬蚊係經紀佣金。講明「賣得到係我哋本事,如果只做到100.5萬,就只收你5,000蚊佣金!」投資者一般都接受。一來覺得街外錢,長搵長有,二來佢哋亦怕經紀唔會第一時畀貨佢,況且佢哋通常唔大貪,只想貨如輪轉,賺到某個數就賣, 「你做到高價收大佣你本事」,所以通常都會肯就範,況且當時啲買家唔係好理係咪接「摸貨」(好多客亦唔知乜嘢係摸貨),只係關注個賣價幾多錢而已。

開張第一個月,公司已經有50幾萬營業額,即刻有盈利。William就同我商量,話其中有個跑到數叫 Joe(化名)嘅年青人,想做埋股東,但同佢一樣唔夠錢,想用日後嘅佣金入股。我諗冇所謂啦,兄弟如手足,一句到尾!如是者公司嘅股東,就由2個,變成3個,最後更令我好似Steve Jobs咁要離開自己一手創立嘅公司……

鄭得明

利嘉閣地產商舖部高級營業董事

——————

密切留意BossMind動向!立即CLS

▴FB

▴Instagram

▴Youtube

舖睇得明|我開第一間地產代理舖首月50萬生意 卻沒料到……|鄭得明
鄭得明
 | 2021.09.21
分享這個帖子
文章精選