舖睇得明|人生第一次買樓 做了7日業主(下)|鄭得明

舖睇得明|人生第一次買樓 做了7日業主(下)|鄭得明

鄭得明 | 2021.09.14

閱讀全文,歡迎加入會員

已是會員? 登入帳號

上文講到,地產經紀A女士帶我睇完三個單位後,最後我竟然買咗一間從未考慮過嘅單位。當她問:「如果低層殘裝單位減價你會唔會考慮?」,我嘅「唔會」都未講出口,她已經自問自答咁馬上叫業主落嚟公司,要佢大減價畀我,等我可以留番啲錢裝修。我都未反應過來,十分鐘後已經有位頭髮稀疏嘅老人家走入店內。A女士馬上話他嘅單位因為太殘舊,加上有平台經常要掃垃圾,所以介紹咁多人去睇都冇一個啱,現在有個貴客出現,但因為預算問題,唔介意以上缺點,但價錢只能畀到45萬。我在旁聽到大吃一驚,業主開價65萬,怎麼可能大減20萬呢個天文數字呢?!

如是者雙方周旋了足足一小時,我在旁聽到目瞪口呆。A最後傾到48萬,未得我同意之下就問我攞身份證登記,跟手叫我去提款機提一萬蚊落臨時訂金,如是者初次買樓經驗就糊里糊塗發生了。筆者在不知不覺間買咗一層自己從來冇諗過買嘅樓,走嘅時候揸住臨時合約還如在夢中。

七日後我上律師樓簽正式合約落大訂(現在通常係14個工作天)。當簽妥後,A問我如果有人畀7萬元我賺,會否考慮放賣呢個單位?我第一時間話有錢賺的話一定會,反正呢個單位並唔係我心中那杯茶。如是者第二天已經賣了此低層殘缺貨色,反正淨係裝修都有排煩。後來才知道這就是摸貨。

簽妥放賣合約後,A又問我有一間靚樓剛剛放盤,不如一齊去睇?「好呀」,心諗反正賺咗錢咪去望下。睇完後A又幫我揸主意約咗個業主落公司傾價錢,結果今次又減咗幾萬成交。如歷史不斷重演,七天後上完律師樓簽正約,過咗兩天後,A又打電話畀我問新單位賣唔賣?賣又有多幾萬蚊落袋,我覺得簡直不可思議,原來坐喺度一個月,咩都冇做過,只需簽兩份文件,都可以賺十幾萬,等於當時樓價約兩成左右。

這次一簽完約後,我第一時間懇求A女士收自己做學徒。我說:「我對地產行業非常有興趣,而且喺我心目中你簡直係神級經紀,口才天下無敵,能人所不能。」A反覆考慮中,之後我連續幾日都喺佢公司懇求,靈機一觸便深情地對佢講:「你腹大便便,走上走落有一定危險性,何況我可以負責帶客睇樓,如果客人睇完最終冇成交,你唔使畀一分錢我;若順利簽成才酌情分小小畀我都沒所謂,我只係欣賞你嘅才華,想跟你學習學習。」其實A心底裏亦怕走來走去出意外,所以最終都答應咗我。

如是者我時刻在旁偷師絕學,當觀察約兩個月後,終於知道原來神一般的人物,背後只要掌握「揸大價」與「敢嘗試」兩項秘技,同時對買賣雙方都揸凸價在手,再慢慢放價錢,正常就開到單!之後我自己就膽粗粗出來開公司,大展鴻圖自己做老闆了......

鄭得明

利嘉閣地產商舖部高級營業董事

——————

密切留意BossMind動向!立即CLS

▴FB

▴Instagram

▴Youtube

舖睇得明|人生第一次買樓 做了7日業主(下)|鄭得明
鄭得明
 | 2021.09.14
分享這個帖子
文章精選