舖睇得明|三口六面講清楚 最終忍痛拆夥|鄭得明

舖睇得明|三口六面講清楚 最終忍痛拆夥|鄭得明

鄭得明 | 2021.10.11

閱讀全文,歡迎加入會員

已是會員? 登入帳號

話說親戚個仔John入職我間地產公司不久,已經慢慢講咗好多不公平嘅事。聽咗兩三次之後,果然同阿King所講嘅情況相差無幾,而且仲嚴重咗㖭!加上最近公司營業額開始下降,我食完飯就返公司走一轉睇下數。點知,冇返去大半個月,10個員工只係剩得2個舊人。觀察咗一陣後我行入大房,正準備攞公司帳目睇時,William同Joe馬上入來房,笑笑口問:「點解突然上嚟公司咁得閒嘅?」。

「今日行開荃灣見有時間咪上嚟睇下公司情況囉,順便了解下公司最近係咪收佣好慢。上次我先墊支荃豐中心分行裝修條數,公司仲未填返畀我。」心諗睇下你點答先。「冇錯」,William道來,「最近收得比較慢,但炒家答應話短期內就會畀返佣我哋公司。」跟住我哋傾下最近公司人事大變動,以及有乜嘢可以改善之類。我不經意講前嗰排阿King約我食飯,兩位馬上露出不自然神態。

Joe問:「點解佢會搵你嘅?乜你同佢咁熟㗎咩?」我回應「幾傾得埋嘅,一向關係都幾好添」,並續道:「阿King同我講咗幾樣嘢,我想你哋坦白同我講,William,你係咪同公司兩個女仔有微妙關係,要照顧佢哋,所以剝削其他伙計啲佣金?」佢好大反應話:「點解咁樣講,絕對冇啲咁嘅事!千萬唔好聽啲走咗嘅人唆擺我哋關係!」

我話出面新入職嗰個John其實係我親戚,佢都證實咗件事,佢哋兩位好愕然咁冇出聲。想起上次阿Joe落力推薦新分行經理阿May,我突然如夢初醒,問Joe:「若我冇估計錯誤,May都係你女友,所以你先畀佢做經理。」

佢默然無語。我心內感覺冷冰冰空洞洞,點解事情會發展到公私不分?其實每一單住宅成交都只需要個半月左右完成,我覺得冇理由佣金咁耐返唔到。不過做得兄弟,我專登唔諗,唔想去猜測手足,覺得如果咁樣諗會好唔道德,但原來事情已經發展到咁嘅地步!「請兩位老實講,係咪你哋攞咗啲冇銀碼支票去提款用住先,如果係嘅唔怕認喎,錢對我嚟講次要,兄弟情先重要!」我心裏期盼着佢哋會給出一個理由,家有困難、炒股輸咗,甚麼也好。

結果William冷冰冰講:「你仲好意思話兄弟,你搵到錢應該分畀大家用下,點解你炒樓冇預我一份,咁公平咩?!(但其實你兩個連入股份錢都未還比我喎)同我做得兄弟就唔應該計呢啲小事,而家我哋只係暫時冇錢,喺公司攞住啲洗都好應該。其實啲錢我哋都有份㗎啦,總之返到公司啲錢,遲啲一定還畀你,最主要就係你本身有錢,唔等錢使。」

真係難以置信多年好友竟然會咁諗,而且夾埋其他人背叛我。我心灰意冷:「呢個教訓買得抵。算了,原本諗住大家一起拍住上搞大佢發達,而家再做落去都冇意思!唔計賺咗嘅錢,搞呢間公司我總數使咗幾十萬,股份送晒畀兩位,我唔玩喇!明天十點我哋去搞清楚手續轉名,當10幾年相識一場禮物!」跟住就起身走咗。心痛不足以形容當時心情,驚覺呢個世界真係好難共富貴。

此後,我哋再冇聯絡過。幾個月後從朋友得知,William因為搞婚外情而離婚,仲亂花錢搞到公司被掏空結業收場……

而家睇返件事,William當時站在佢嘅立場一定覺得自己冇做錯。畢竟人人成長過程唔同。所以冇得要求人哋同你嘅價值觀一致,有啲事情不管你準備好未都會發生,唯有轉化為接受,人生就係咁!

呢件事證明咗你呃咗好朋友唔係叻仔,要證明自己幫咗幾多人先係成功,好遺憾我幫唔到佢!呢件事亦令我有陰影,唔再創業做老闆,當時只係想做快樂小經紀,炒下樓之餘又傾下刁最開心,冇諗到後來仲走上地產界公認最難掌握嘅舖位顧問之路添。

鄭得明  利嘉閣地產商舖部高級營業董事

——————

密切留意BossMind動向!立即CLS

▴FB

▴Instagram

▴Youtube

舖睇得明|三口六面講清楚 最終忍痛拆夥|鄭得明
鄭得明
 | 2021.10.11
分享這個帖子
文章精選