舖睇得明|一代新人教舊人 向新人王學習「活下去」|鄭得明

舖睇得明|一代新人教舊人 向新人王學習「活下去」|鄭得明

鄭得明 | 2021.11.16

「三人行必有我師」,世界在變,近年地產行業頻頻有新轉職人士加盟,帶來好多新思維和其他行業的經驗人才,衝擊到行內競爭急速提升,連帶我哋管理層都有新嘅領悟。今日先同大家分享一個「新人王」的加盟歷程。

俗語話:「男人最怕入錯行」,但即使抉擇正確,以為可以無風無浪高薪厚祿等退休,但「變幻才是永恆」唔只出現喺歌曲,一場新冠肺炎導致全世界、包括香港經濟大混亂,百業蕭條。一向被譽為係「鐵飯碗」的職位被裁、各行業嘅高級管理人才紛紛下馬,Patrick亦不例外。

30年前他人生第一份工係加入一間大型製衣設備公司,憑藉能言善道、好學不倦,用了僅僅14年時間,於2005年成功晉升至亞太區銷售總監,年薪七位數字。可是,突如其來嘅世紀冠狀病毒,令全亞太封城停市、工廠停產,公司岌岌可危。同事們心知「炒魷」將至,Patrick為保多年同事飯碗,就算高薪厚祿亦主動請辭,暫時休息,為公司節流。積極的他趁機增值自己,報考地產和保險牌照,多「兩把刀」傍身。

「做地產嘅多數係讀唔成書嘅人做,而做保險直情斷六親添!不如你暫時休息下,等疫情過後重操故業咪仲好!」太太知道後情願Patrick被動「等運到」。Patrick雖然尊重太太,但坐唔定嘅佢,性格一向要掌握主動權,最後佢選擇了傳統中國人最鍾意嘅磚頭事業。由於長期從事製衣業,Patrick認識好多自用舖位的業主,加上希望在假日陪伴家人,所以選擇專攻舖位市場(舖位部5天半工作)。

Patrick同太太有個協議——畀3個月時間自己融入行業,首要目標90天內開到單,1年後要有大進展站穩陣腳。喜歡挑戰嘅Patrick,由返工第1天已經唔願收工,像索水海綿一樣,狂吸資料和行業訊息,主動來問我了解下開單需要甚麼文件、合約內應關注嘅事項和細節,又影印份臨時合約照着填寫再畀主管評價。

我做呢行咁多年,通常新入行或者轉行嘅人,都係「要先學習一段時間」,然後才諗「開單」(哈,但其實商業機構,點會畀你學成先行山)。從未見過有新入職同事開單意欲咁強,所以我重點觀察佢嘅日常工作。

「要開單先要行舊路」,Patrick深明呢個道理,善用自己往日累積的人脈優勢,每天都去拜訪深水埗區,主力荔枝角道衣車行舊客戶,逐間逐戶拜訪派卡片,了解下佢哋有冇需要放賣、放租或者買入、賣出磚頭(因為製衣業已經係舊行業,好多老行尊都係自用舖主,不少都計劃緊退休、生意留畀舊伙計上或乾脆結業賣舖)。

如是者Patrick 好快搵到舊客落order去傾租舖,佢即時開turbo「洗街」update晒放租盤,加上製衣業朋友圈提供有效情報,頭10天佢已經開第1張單,入職兩個月已經開咗3張租單,基本上已企穩陣腳。由於頻頻開單,一些舊人更暱稱佢為「新人王」。

我經常在早會時段問Patrick一些問題,希望藉着新人對答去喚醒舊人多一點反思。例如,「點樣可以短時間了解和釐清客人的需要,促成舖位租約?」,「人天性保護自己,我通常會通過一啲漫不經意嘅話題同客人傾計,弄清楚想要嘅資料,而且所問不限於某一目標,令到客人放下疑慮,坦白回答,咁就容易促成單deal啦!」Patrick的回答果然極為老練!

「我鍾意睇小說,經常喺小說之中晤出道理,睇到有啲人要盡收天下武器為己用,我就鍛鍊一把刀去盡擋天下兵器變化。『由簡達博』太嘥時間,我鍾意『由博入簡』,用頻率去打,不停call客,用一招足以打天下!」,Patrick補充。「咁你始終搵少咗㗎,以前個個月6位數字人工,而家暫時得5位數,你點睇呀?」我又試探下佢。

「往日快劍江湖,長街狂奔。急速但有意思!今日明月清風,流水高山。人生一樣快意!」他豁然一笑。「人搵多搵少都係為兩餐,仔女已經出晒身,有自己世界,就算風起雲湧,至少證明到自己依然可以『活下去』,搵得少過以前係暫時嘅,預期會越做越好!」Patrick自信滿臉。

此番高論,已昇華至另一個境界!睇嚟我都要投入小說行列,提升一下層次高度了!

鄭得明  利嘉閣地產商舖部高級營業董事

——————

密切留意BossMind動向!立即CLS

▴FB

▴Instagram

▴Youtube

舖睇得明|一代新人教舊人 向新人王學習「活下去」|鄭得明
鄭得明
 | 2021.11.16
分享這個帖子
文章精選