內地富豪持有的前亞洲最貴分層住宅凱旋門朝日閣頂層複式A室「天際獨立屋」放售，連同其他4個凱旋門單位，意向價13億元，呎價15.7萬元，挑戰亞洲最貴分層住宅單位的寶座。呢個單位係點樣，望出去有幾正，過去十幾年來一直都令人好好奇，亦是當年小弟在報館未能完成的任務。試過話有無可能用支超長焦距窺探內櫳卻連影都見唔到，試過扮住客上門打算影下個門口都好，卻在大堂被保安勸退。timing唔啱，幾努力都無料返。今日唔聲唔聲，曾經拍唔到的單位竟然傳通街。廢話講完，呢間天際獨立屋，實用面積4,263方呎，有個空中天際泳池，有個1,278方呎空中花園及90方呎平台花園。室內設計佈局，我以為去咗珍寶海鮮舫。資料顯示，物業由內地富豪先後於2007年及2011年買入上述5個單位，涉及共約2.7億元。我搵返2007年《新報》報道：「新地剛以1.84億元售出朝日閣頂層天際獨立屋，每呎造價高見3.35萬元，成為全亞洲最貴的分層豪宅。買家傳為中聯石油化工董事局主席許智明及有關人士，惟發展商新地未有透露買家身份，僅表示該單位主人為一中港商人。新地代理執行董事雷霆認為，今年股市暢旺，財富效應帶動樓市走向，尤其供應不多的豪宅物業，更備受有實力人士追捧，相信是近年豪宅價錢越賣越高的主要原因，預期在不少買家『畀得起錢』下，本港頂級豪宅樓價仍有上升空間。」當日天際獨立屋創了亞洲之最，雷霆話香港頂級豪宅仲有得升。結果樓神就係樓神，樓市升到而家。
BossMind小記 上
BossMind小記 上
——————
密切留意BossMind動向！立即CLS
