銘想英國|High Tech不如B Tech|陳思銘

|

當好多心急的媽咪問佢哋個仔點樣去到英國,行一條甚麼路可以入牛津劍橋的時候,這幾年,我的標準引導方式是:我明白,全世界所有的女人買手袋,一定首選愛馬仕或者Chanel;或者港女揀男友,反而唔會prefer姜濤,首選一定係成熟智慧型的黃子華。

我時時溫馨提示:黃子華唔係由哈佛耶魯或者牛津劍橋PPE畢業,而係加拿大某間大學,讀嗰科更係全世界僱主最唔願意聘請的哲學系。

黃子華攞彩,唔係拋書包在大學講老子和尼采,而係以佢嘅想像力將哲學結合,以香港特定嘅現實社會常識邏輯,見人所不能見,言人所不敢言,所以開到十場紅館,盤滿缽滿。

或者可以咁講:世界上有好多自以為懷才不遇嘅哲學博士,但地球上只有一個化理論為利潤、路路通嘅黃子華。

因為沒有一個哈佛劍橋牛津PhD可以在紅館開20場講人生哲學,跟住一套電影做主角香港淨收一億。

黃子華唔係名校PhD,英國的BTech,就可以係另類的人才、幹才、專才的教育工廠。

本來,傳統的大學只有兩種學位:文學士(BA: Bachelor of Arts) 和理學士(BSc: Bachelor of Science ) 。

隨着全球經濟結構的變化,BA和BSc兩種學位,已經追不上時代現實需要。於是又另有一種「技術學士」,簡稱B Tech,成為學術資格的另一種勢力。

不過在B Tech之外,英國近年還有一個新的學歷資格,叫做BTEC,兩者完全不同,不可混淆。

B Tech是大學頒的學位,入學第一年開始計算分數。但BTEC的起步,最早可以在高中的GCSE,開始與其他中學正常科目一齊修讀。

BTEC有一項「輔助文憑」(Subsidiary Diploma ),當做一科A-level成績計算。而正式的BTEC Diploma ,就可以當做兩科A-level成績。另外還有一個while a「BTEC附加文憑」(BTEC Extended Diploma ),直情可以承認當做三科A-level,因此,學生可以好似揀自助餐一樣,混合A-Level科目和BTEC一齊修讀,一樣可以考得入好多英國大學。

選擇雞尾酒方式的好處,就係即使在高中,透過揀一兩科BTEC,一個高中生已經可以超前擁有某種技術工藝的實習經驗,為將來大學畢業後進入社會工作,在學歷加咗一層光彩,更加現實,而唔係齋讀書紙上談兵。因為近年英國好多大學和僱主商討之後,發現太多大學生揸住啲哲學文學之類的學位,崇尚空談,不切實際,郁啲就話要性別平權,對社會產業和GDP全無幫助。

其實,既然世界進入大戰熱身時期,點解讀書一定要理論多多的牛津PPE?PPE返來香港,最多入立法會,當你發現坐在你隔離的青年才俊,聲稱留學英美,又有名牌大學學位,但冇一個英文程度超過李家超,但可以優先環遊世界講香港故事,咁你就會怨點解當年日咪夜刨A Level讀一個牛津PPE,原來都幾老襯。

英國社會幾百年來,由工業革命開始,主流係講求實際。

香港人受殖民地統治,眼中只見到半島文華扒房衣冠楚楚的鬼佬,包括滙豐大班蒲偉士與馬會主席彭福,而真正的英國人,例如Elton John和米高堅,不會出現在七十年代的中環Hong Kong Club。

直到今日香港人終於發現,有啲紋身的西人會爛撻撻住在筲箕灣或觀塘,着一對拖鞋與一個菲律賓姐姐竟然出現在茶餐廳。

因為There has always been another hidden Britain。

英國的主流社會並不個個追求牛津劍橋。在中產家庭,有一個子女如果能報讀BTEC,全名:Business and Technology Education Council頒發的實用職業技能文憑,搵到好Pay的工作,機會高過牛津劍橋文史哲畢業。

例如,前足球明星連尼加不滿英國政府拒絕收容難民而當初被BBC停職、跟住BBC又投降、連尼加復職,原來因為英超已成為英國經濟發展動力、以及連BBC主席都要怕三分的足球產業。BTEC的熱門科目,包括體育管理(Sports Management ),而朗拿度或連尼加賺錢多過文學和哲學的倫敦大學教授十世人。

新冠病毒之後,香港人個個爭住外遊,全球旅遊經濟復甦,連香港的幾間貴價酒店,都由新冠疫情期間每晚價格一千多元回增至四、五千,BTEC 就有一科酒店管理,可以保證,報名人數踴躍,而且已經冇幾年前咁容易取錄。這一科今日已經不再叫做Hotel Management,而是更「人性化」的Hospitality Studies。

下一代普遍不願生育,父母有億萬家財,仔女趨向珍貴,下一代如何教育子女,家庭輔導逐漸成為另一種專業。BTEC另外仲有一科,叫做

Children’s Play, Learning and Development。兒童教育有綜合全面的理論和實習,成為一個學位,這一點,就是配合千變萬化的全球化經濟體系。

另外,Travel and Tourism亦成為一個科目:「旅行及旅遊系」。

BTEC的最大優勢,就係可以在讀GCSE和A Level的時候,同時選修一科BTEC的一個核心課程。進可以攻、退可以守。咁就要揀定那幾家大學,可以接受一科BTEC代替一個A Level,成為考入大學的資格標準之一。即係話非常彈性,而且越來越多英國的大學,會避開一些空談的文科,側重實習。

BTEC通常重視實習,而且會有企業專門尋找對口的學生。在電訊高科技領域,項目分工越來越精細,名牌的大學,好似一隻大船,改變方向或者內部裝修,往往沒有一架小船或者一間小單位方便。僱主反而會在部門分得精細的課程和大學尋找人才。

英國的教育日新月異,緊貼全球化形勢,有好多變化,並非香港一般學生或家長所能追貼而明白。BTEC並非毅進課程,而係強勁的第三勢力,有如性別,今日西方世界不只兩種,Male和Female之外,還有很多層次。我們做教育顧問這一行,同各位做天文台一樣,發現一個星系,遙遠地發出光芒,我一定會向各位報告:無論宇宙幾咁深遠,只要有光,就係一顆恒星,就有希望。

陳思銘 Samuel Chan
https://www.facebook.com/ukchitchat

註:專欄作家言論不代表本網立場

密切留意BossMind動向!立即CLS

FB    Instagram    Youtube

#
Social media & sharing icons powered by UltimatelySocial
error

Enjoy this blog? Please spread the word :)