「最心痛是，愛得太遲……」，可以話係無數中港投資者，甚至外資機構投資者呢排喊住唱嘅飲歌。截至2024年9月底，恒指收報21,133點，係2023年2月14日以來最高，即超過十九幾個月最高水平，單月累升17.5%，暫於今年累升近24%。同期美股道指累升約12.3%，若由2022年底計起累升約27.7%，較港股今年首九個月表現只係高出約3.7%，對近年不少鍾情於美股，甚至褒美股而貶港股嘅朋友，港股都算係威返次。
如果以月為單位，今年我哋有八次機會可於低水平買入港股。截至去年12月底，恒指歷史市盈率為10.58倍，美股道指是26.68倍，就算後者減半，差距仍超過26%。至於從2024年1月底至8月底，恒指歷史市盈率介乎9.45至10.58倍，撇除5月底嘅10.58倍，其餘七個月市盈率更低過舊年12月底，介乎9.45至10.42倍，無數投資者卻無視呢八次「執平貨」機會。另可留意由9月4至16日共八個交易日，恒指均收低於17,500點 (市盈率不到10.10倍)，原來在9月中或之前，我們重有好多執平貨機會。
上週初外資大戶建議大眾買入港股時，恒指已經喺19,000點之上，經已由低水平累升超過一成；倘若再觀望三至四日，唉，原來到9月底，恒指已上到21,000點樓上，相對低於17,500點，無數大戶散戶先驚覺愛得太遲而嘗試補救。故此9月最後兩日港股成交金額分別錄得超過4,457億和5,058億港元，係今年1至8月日均成交額約1,060億元的4.20和4.77倍，呢班投資者肯定係喺恒指20,000點之上先紛紛入市，試問最終喺今次升浪能賺多少？又有多少人結果要損手離場呢？
金缸經
註：專欄作家言論不代表本網立場