正當Nvidia短線反彈逾3成，好自然地會諗到下一隻應該輪到AMD啦掛，早前低見100美元水平，現價彈上120美元左右。相對落後得嚟，點解遲遲未郁？
原因之一，可從產業上遊台積電主席Mark Liu早兩日言論講起，佢認為全球對電子消費產品需求開始放緩，例如電話、電腦PCs及電視等，當中原因包括係俄羅斯入侵烏克蘭及中國封城。Mark Liu就強調對台積電影響不大，因為TSM自己的產能仍然供不應求，但言下之意，首先有衝擊係賣晶片產品的AMD及Intel。
原因之二，陸續有分析師開始調低今年半導體收入預期，列出原因主要係睇今年經濟放緩，GDP升幅平穩。而整體半導體板塊同經濟高低相關性高，無論從consumer side定enterprise side去睇，都會有減低需求。
股價已反映？
的確AMD股價較高位調整近3成，估值更加係勁縮4成，未來1年PE由40倍減至24倍，低於3年平均水平。
關鍵要睇PE入面個E能否保持得住，現時分析師睇2022年每股盈利由以早前$4.02，縮落去$3.69。夾埋一齊睇，當估值低咗、要求低咗、機會係咪多咗？
未來3個月會有2個機會，只要AMD達成早前業績指引預期，而全年達標有252億收入，已經交到功課。雖然PCs市場放緩，但Data Center會唔會填得到？以AMD往績計，往往可以完成以至超越業績指引。
第2件事仲有6月9日analyst day，係2年以來首次舉行，屆時管理層應該會講返收購Xlinix，將對AMD有何幫助。屆時有新故事講的話，就可以擺脫經濟及消費增長放緩的困境。
最後順帶一提，OXY CEO跟住股神腳步，最近以$56左右加注，似乎唔怕油價波動，睇得幾好。